Robert Köçəryan və Serj Sarqsyanın barəsində beynəlxalq axtarış elan edilib

Bakı/21.02.22/Turan: Ermənistanın iki keçmiş prezidenti Robert Köçəryan və Serj Sarqsyanın barəsində beynəlxalq axtarış elan edilib.

Bu barədə Turan agentliyinə Azərbaycan Hərbi Prokurorluğunun xüsusi istintaq şöbəsinin rəisi Emil Tağıyev bildirib.

Onun sözlərinə görə, hələ 1992-ci ildə Köçəryan və Sarqsyan Cinayət Məcəlləsinin 107 (əhalini deportasiya etmə və ya məcburi köçürmə), 109 (təqib), 220 (kütləvi iğtişaş), 310-cu (vəzifəli şəxsin səlahiyyətlərini mənimsəmə) maddələrilə istintaqa cəlb olunublar.   

1994-cü ildə onların  barəsində beynəlxalq axtarış elan edilib.

“2018-ci ildə Azərbaycan Baş Prokurorluğu Köçəryan və Sarqsyanın barəsində beynəlxalq axtarışı yeniləyib”, -  o qeyd edib.

Sarqsyan və Köçəryan 1988-ci ilin fevralından keçmiş Dağlıq Qarabağ Muxtar Vilayətinin erməniləri arasında Azərbaycan xalqına qarşı nifrət oyatmağa, milli düşmənçilik salmağa yönəlmiş fəaliyyətdə ittiham olunurlar.

Əsasən, "Qarabağ ermənilərə məxsusdur" təbliğatını apararaq, azərbaycanlıları iş yerlərindən qovmağa, onları zorla bölgədən çıxarmağa, əmlakı məhv etməyə çağırıblar.

Bundan əlavə, özlərini “dövlət hakimiyyəti” nümayəndələri adlandıraraq Azərbaycan Respublikasının Konstitusiyasına zidd olaraq 2 sentyabr 1991-ci il tarixində keçmiş Şaumyan rayonu da birləşdirilməklə “Dağlıq Qarabağ Respublikası”nı elan ediblər. Köçəryan və Sarqsyanın rəhbərliyilə həmin ərazidə Azərbaycan Respublikası Konstitusiyasının və qanunlarının qüvvədən düşməsi barədə qanunsuz qərarlar qəbul edilib, Tağıyev bildirib.

Köçəryan və Sarqsyan 1992-ci ilin fevralında törədilmiş Xocalı soyqırımında da ittiham olunurlar. Azərbaycanlı əhalinin yaşadığı bu şəhərin işğalı zamanı 613 mülki şəxs öldürülüb.03B06-