Rusiya Azərbaycanla Ermənistan arasında sülh müqaviləsinin Moskvada imzalanmasını təklif edir

Bakı/18.07.23/Turan: Ötən gün Moskvada Rusiya Federasiyası xarici işlər nazirinin müavini Andrey Rudenko Azərbaycan Respublikasının Rusiyadakı səfiri Polad Bülbüloğlu ilə görüşüb.

"Söhbət zamanı Cənubi Qafqazdakı vəziyyət, Bakı və Yerevan arasında barışıq prosesi müzakirə olunub. Rusiya tərəfi Laçın dəhlizinin tam və dərhal açılmasının, 9 noyabr 2020-ci il tarixli üçtərəfli bəyanata uyğun olaraq hər iki istiqamətdə onunla nəqliyyat əlaqəsinin bərpasının, habelə Dağlıq Qarabağın normal həyat təminatı üçün şəraitin yaradılmasının vacibliyini bildirib", - Rusiya Xarici İşlər Nazirliyinin məlumatında deyilir.

Rusiya Xarici İşlər Nazirliyinin 15 iyul bəyanatı ilə bağlı  "Azərbaycan Xarici İşlər Nazirliylinin yanlış şərhlərilə" əlaqədar qeyd olunub ki, Rusiya Federasiyası Azərbaycan Respublikasının ərazi bütövlüyünə hər zaman hörmətlə yanaşıb və yanaşır, müttəfiqlik qarşılıqlı fəaliyyəti haqqında ikitərəfli Bəyannamənin ruhuna və hərfinə tam sadiqdir".

"Eyni zamanda, bu, Ermənistan-Azərbaycan normallaşma prosesinin kompleks şəkildə irəliləməsini, gündəmdə olan bütün məsələlərin həllini, o cümlədən Dağlıq Qarabağ əhalisinin hüquq və təhlükəsizliyinin yalnız dinc siyasi-diplomatik metodlarla təmin edilməsi vəzifəsini ləğv etmir", - Rusiya Xarici İşlər Nazirliyinin məlumatında deyilir.

Rusiya tərəfi sülh müqaviləsinin razılaşdırılması mövzusu da daxil olmaqla, ən yüksək səviyyədə razılaşmaların həyata keçirilməsinin yollarını müzakirə etmək və sözügedən sənədin imzalanması üçün Rusiya, Azərbaycan və Ermənistan liderlərinin Moskva sammitini müzakirə etmək üçün yaxın vaxtlarda Moskvada xarici işlər nazirlərinin üçtərəfli görüşünü təşkil etməyə hazır olduğunu təsdiqləyib. "Görüş qarşılıqlı hörmət və konstruktiv şəraitdə keçib", - Rusiya Xarici İşlər Nazirliyinin məlumatının sonunda deyilir.

Dünən Azərbaycan Xarici İşlər Nazirliyinin rəhbəri Ceyhun Bayramov Rusiyanın yeni təyin olunmuş səfiri Mixail Yevdokimovu qəbul edib və Rusiya Xarici İşlər Nazirliyinin 15 iyun tarixli bəyanatında regionda vəziyyətin yanlış qiymətləndirildiyini bildirib.

Rusiya Xarici İşlər Nazirliyinin 15 iyul bəyanatında Laçın sərhəd- keçid məntəqəsinin fəaliyyətilə bağlı regionda "gərgin humanitar vəziyyət"in yaranmasına dair iddialar reallığı təhrif edir, Bayramov deyib.

O bildirib ki, bu məntəqədən keçidin məhdudlaşdırılması Ermənistan tərəfinin təxribatları ilə bağlıdır. Eyni zamanda, Ağdam-Xankəndi yolundan Azərbaycanın erməni sakinlərinin ehtiyaclarını ödəmək üçün istifadə etmək mümkündür.

Rusiya  Xarici İşlər Nazirliyinin bəyanatında qeyd olunduğu kimi, erməni sakinlərin "hüquq və təhlükəsizliyi" məsələsinə gəlincə, bu məsələ Azərbaycanın milli qanunvericiliyi çərçivəsində həll ediləcək və bu məqsədlə erməni sakinlərlə dialoq təşəbbüsü mövcuddur, Ceyhun Bayramov qeyd edib.  06В