Rusiya baş nazirinin səfəri çərçivəsində ikitərəfli sazişlər imzalanıb

Bakı/18.11.22/Turan: Rusiyanın baş naziri Mixail Mişustinin Azərbaycana ilk səfəri zamanı, noyabrın 17-də Bakıda XI Azərbaycan-Rusiya regionlararası forumu keçirilib.

Bundan sonra ölkələrin hökumət başçıları Əli Əsədov və Mixail Mişustin arasında danışıqlar aparılıb.

Görüşün yekunlarına əsasən bir sıra ikitərəfli saziş imzalanıb:

1. Cinayət yolu ilə əldə edilmiş gəlirlərin leqallaşdırılmasına, fiziki şəxslər tərəfindən nağd pul vəsaitlərinin transsərhəd daşınması zamanı terrorizmin maliyyələşdirilməsinə qarşı mübarizə sahəsində informasiya əməkdaşlığı haqqında hökumətlərarası saziş;

2. Sərhədyanı ərazilərdə vəba üzrə epidemioloji rifahın təmin edilməsinə dair əməkdaşlıq haqqında sazis;

3. Beynəlxalq tibb-sanitariya qaydalarının tətbiqi üzrə əməkdaşlıq haqqında saziş;

4. İki ölkə arasında dövlət sərhədindən buraxılış məntəqələrinin əlaqələndirilmiş inkişafı məqsədilə əməkdaşlıq haqqında saziş.

5. Nəqliyyat sahəsində kadrların hazırlanması və yenidən hazırlığı sahəsində əməkdaşlığın inkişafına dair anlaşma memorandumu;

6. Gəmiqayırma sahəsində əməkdaşlıq haqqında memorandum.

Danışıqlar zamanı Əli Əsədov qeyd edib ki, iki ölkə arasında iqtisadi əlaqələr fəal şəkildə inkişaf edir. Cənubi Qafqazda Azərbaycan Rusiyanın əsas ticarət tərəfdaşıdır. Bu ilin 10 ayı ərzində qarşılıqlı ticarət 20 faizdən çox artaraq 3 milyard dollara yaxın olub.

Bu ilin 10 ayı ərzində Azərbaycan və Rusiya arasında yük daşımalarının ümumi həcmi təxminən 22 faiz artıb. Rusiya yüklərinin Azərbaycan ərazisindən tranzit daşınması xeyli artıb. İlin əvvəlindən 98 faiz artım qeydə alınıb. “Şimal-Cənub” beynəlxalq nəqliyyat dəhlizi prioritet əhəmiyyət kəsb edir, Əsədov deyib.

Öz növbəsində Mişustin qeyd edib ki, hökumətlərarası dialoq ticarət-iqtisadi- sənaye kooperasiyası, nəqliyyatda qarşılıqlı fəaliyyət, energetika  və mədəni-humanitar sahələrdə əməkdaşlığın inkişafına yönəlib.

Rusiya Azərbaycanın aparıcı ticarət tərəfdaşlarından biridir.

Azərbaycanda Rusiya kapitallı  900-dən çox birgə müəssisə fəaliyyət göstərir. Bunlardan təxminən 300-ü 100 faiz Rusiya kapitallıdır. Müvafiq olaraq, Azərbaycan biznesi də Rusiyada öz iştirakını artırır.

“Biz Avrasiyanın mərkəzində və Xəzər regionunda Rusiya və Azərbaycanın əlverişli coğrafi mövqeyindən tam istifadə etməli, nəqliyyat və tranzit potensialını fəal şəkildə inkişaf etdirməliyik.

Bu, ilk növbədə “Şimal-Cənub” beynəlxalq nəqliyyat dəhlizi çərçivəsində dəmir yolu, avtomobil, dəniz infrastrukturunun yaradılmasıdır. O, Rusiyanı, Azərbaycanı Fars körfəzi ölkələri, Hindistan, Çin, Afrika dövlətləri, Asiya-Sakit okean regionu ilə birləşdirəcək”, - Mişustin qeyd edib.

“Biz Rusiya, Azərbaycan və Ermənistan liderləri arasında Zaqafqaziya iqtisadi və nəqliyyat əlaqələrinin açılması üzrə razılaşmaların yerinə yetirilməsinə xüsusi əhəmiyyət veririk. Əminik ki, yeni infrastruktur layihələrinin həyata keçirilməsi Cənubi Qafqaz dövlətlərinin hamısının maraqlarına cavab verir”, - Mişustin deyib.

Bu gün dövlət başçısı İlham Əliyev Mişustini qəbul edəcək. 02D