Rusiya Federasiya Şurasının sədri Valentina Matviyenko Azərbaycanda səfərdədir

Bakı/12.04.19/Turan: Rusiya Federasiyası Federal Məclisi Federasiya Şurasının sədri Valentina Matviyenko Azərbaycana səfəri çərçivəsində president İlham Əliyev, birinci vitse-prezidnet Mehriban Əliyeva və Milli Məclisin sədri Oqtay Əsədovla görüşüb.

Prezident İlham Əliyev Valentina Matviyenkonu Azərbaycanın "Dostluq" ordeni ilə təltif edib.

Görüşlərdə Azərbaycan ilə Rusiya arasında dostluq əlaqələrinin daha da möhkəmləndirilməsi diqqət mərkəzində olub.

Milli Məclisin sədri Oqtay Əsədov bilidirib ki, Azərbaycanla Rusiya arasında dövlət və hökumət səviyyəsində 227 ikitərəfli sənəd imzalanıb.

"Rusiya Azərbaycanın ən vacib ticarət tərəfdaşlarından biridir. 2018-ci ildə ölkələrimiz arasında ticarət dövriyyəsi 19 faiz artıb. Hər il Rusiya-Azərbaycan Regionlararası Forumu keçirilir.

O.Əsədov Azərbaycanda rus dilinə və mədəniyyətinə diqqətlə yanaşıldığını deyib.

"Bu gün Azərbaycanda Slavyan Universiteti, 300-dən çox rusdilli orta məktəb fəaliyyət göstərir. Ölkəmizin 27 ali məktəbində rus dilində dərslər tədris olunur. Azərbaycanda M.V.Lomonosov adına Moskva Dövlət Universitetinin və İ.M.Seçenov adına Birinci Moskva Dövlət Tibb Universitetinin filiallarında azərbaycanlı tələbələr təhsil alır. Ölkəmizdə ən böyük icma rus icmasıdır", - o bildirib.

Valentina Matviyenko deyib ki, keçən il iki ölkə arasında ticarət dövriyyəsi 2,5 milyard ABŞ dolları təşkil edib.

"Rusiya Azərbaycan iqtisadiyyatına 1,5 milyard ABŞ dolları məbləğində investisiya yatırıb. Keçən il 800 min rusiyalı turist Azərbaycanı ziyarət edib."

Onun sözlərinə görə, Rusiyanın ali məktəblərində təqribən 15 min azərbaycanlı tələbə təhsil alır.

"Azərbaycanda rus dilinin və mədəniyyətinin qorunması Rusiyada yüksək dəyərləndirilir. Rusiya da həmçinin Azərbaycan dilinin, mədəniyyətinin qorunub saxlanılmasına çalışır", - o qeyd edib.

Ermənistan-Azərbaycan Dağlıq Qarabağ münaqişəsinə toxunan V.Matviyenko bildirib ki, onun ölkəsi münaqişənin sülh yolu ilə həll olunmasına səy göstərir. Bu münaqişənin həllinin başqa yolu yoxdur. Rusiya Dağlıq Qarabağ probleminin həlli istiqamətində səylərini azaltmayacaq.-03D-