Rusiya Xarici İşlər Nazirliyinin Lavrovun Bakıya qarşıda duran səfəri haqqında məlumatı

Bakı/10.05.21/Turan: 10-11 may tarixlərində Rusiya xarici işlər naziri Sergey Lavrov Bakıya işgüzar səfərə gələcək. Səfər çərçivəsində onun Azərbaycan prezidenti İlham Əliyev və xarici işlər naziri Ceyhun Bayramovla görüşləri planlaşdırılır. 

Rusiya Xarici İşlər Nazirliyinin səfərlə bağlı məlumatında deyilir: "Rusiya tərəfi Azərbaycanla münasibətlərin bütün inkişaf spektri üzrə - siyasət, iqtisadiyyat, mədəniyyət sahəsində, humanitar sahədə açıq və qarşılıqlı hörmətə əsaslanan dialoqu davam etdirmək niyyətindədir. 

Rusiya, Azərbaycan və Ermənistan liderlərinin 9 noyabr 2020-ci il və 11 yanvar 2021-ci il tarixli bəyanatlarının hərtərəfli həyata keçirilməsinə xüsusi diqqət yetiriləcək. Dağlıq Qarabağda vəziyyətin, Dağlıq Qarabağ nizamlanmasının humanitar aspektlərinin, münaqişədən sonra bərpa və dinc həyatın qurulması məsələlərinə nəzər salınması planlaşdırılır. Əsas vəzifələr arasında regionda bütün nəqliyyat əlaqələrinin və iqtisadi əlaqələrin açılması da var". 

Azərbaycan və Rusiya xarici siyasət idarələrinin rəhbərləri əsas regional və beynəlxalq birliklərin - Müstəqil Dövlətlər Birliyi, Birləşmiş Millətlər Təşkilatı, Qoşulmama Hərəkatı, Avropa Şurası, Qara Dəniz İqtisadi Əməkdaşlıq Təşkilatı çərçivəsində qarşılıqlı fəaliyyətin əlaqələndirilməsi məsələlərini müzakirə edəcəklər. 

"Regionda qüvvələr balansının qorunub saxlanması zərurəti nəzərə alınmaqla qurulan Rusiya-Azərbaycan hərbi-texniki əməkdaşlığı əhəmiyyətli xarakter daşıyır". 

2019-cu ildə Rusiya Azərbaycana səfər edən turistlərin sayına görə birinci yerə çıxıb (900 min nəfərdən çox), deyə məlumatda bildirilir. -02D-