Rusiyanın «Erebuni» hərbi bazasına yeni MiQ-29 qırıcıları gətirilib

Yerevan/ 20.02.16/Turan- Armİnfo: Rusiyanın Ermənistandakı “Erebuni” hərbi aviasiya bazası əsaslı təmirdən sonra dörd ədəd dördüncü nəsil MiQ-29 qırıcısı, bir ədəd MiQ-29C və modernləşdirilmiş M-8MT nəqliyyat vertolyotu qəbul edib.

RF Cənub Hərbi Dairəsinin mətbuat xidməti bildirib ki, həftə ərzində aviatexnika hərbi-nəqliyyat aviasiyasının təyyarələr ilə Krasnodar diyarından Yerevan hərbi aerodromuna gətirilib.

Yaxın vaxtlarda qırıcılar və vertolyot işə salınacaq. Birləşmə pilotları bu il martın ortalarından MiQ-29 qırıcıları ilə uçuşa başlayacaqlar.

Dekabrda Rusiya Ermənistandakı aviabazaya 6 ədəd Mi-24P zərbəçi və Mi-8MT nəqliyyat vertolyotları göndərib. Bundan öncə ora 7 ədəd Mi-24 və Mi-8 MT göndərilib.

Yerevandakı aviabaza 1995-ci ildə yaradılıb. 1998-ci ilin noyabrında bazaya çoxməqsədli MiQ-29 qırıcıları yerləşdirilib. 2001-ci ilin iyulunda “Erebuni”də yerləşdirilən hissələrdən aviasiya bazası yaradılıb və bu, Rusiyanın Gümridəki 102 saylı hərbi bazasının hava komponentinə çevrilib.

Müxtəlif məlumatlara görə, “Erebuni” hərbi aerodromunda onlarla MiQ-29 var.

Ermənistan HHQ təyyarələri də orada yerləşir, onların çoxu Su-25 hücumçu təyyarələrdir.-0-