Rusiyaya məxsus helikopterin vurulması hadisəsi Azərbaycanda təhqiq edilməlidir

Bakı/06.01.20/Turan: Ötən il noyabrın 9-da Ermənistan-Azərbaycan sərhədinin Naxçıvan hissəsində Rusiyaya məxsus hərbi helikopterin vurulması hadisəsi Azərbaycanın istintaq orqanları tərəfindən təhqiq edilməlidir. Bu fikri hüquq sahəsində ekspert Ələsgər Məmmədli  Rusiya hərbi prokurorluğunun bu faktla bağlı işi yenidən tövsif etməsini Turan-a şərh edərkən bildirib.

“İnterfaks”ın məlumatına görə, Rusiya hərbi müstəntiqləri RF CM-in 351-ci (uçuş qaydalarının pozulması, ehtiyatsızlıqdan insan ölümünə səbəb oludqda) maddəsini 105.2-ci (qəsdən iki və daha çox adam öldürmə) maddə ilə əvəz edib. 

Agentliyin mənbəyi “iş üzrə şübhəli bilinən şəxslərin başqa dövlətin ərazisində olması ilə əlaqədar” təhqiqatın çətin olduğunu qeyd edib. Buna görə Rusiya hərbi müstəntiqləri kömək üçün Azərbaycanlı həmkarlarına müraciət ediblər.

“Məmmədlinin fikrincə, bu işin təhqiqatını yalnız Azərbaycan prokurorluğu apara bilər. Prokurorluq bunu yalnız Azərbaycan qanunvericiliyi çərçivəsində araşdırmalıdır. Hadisə Azərbaycanda hərbçilər tərəfindən hərbi xidmət zamanı törədilib. Azərbaycanda yalnız Azərbaycanın suveren hüquqları etibarlıdır”, deyə Məmmədli bildirib.

Hüquqşünas qeyd edib ki, istintaq başa çatdıqdan sonra təqsirkarlar olarsa, onları yalnız Azərbaycan məhkəməsi mühakimə edə bilər.

Azərbaycan Baş Prokurorluğunun mətbuat xidmətinin rəhbəri Günay Səlimzadə Turan-a bildirib ki, Baş Prokurorluq vurulmuş helikopterlə bağlı Rusiyadan heç bir rəsmi sorğu almayıb.

Naxçıvan Hərbi Prokurorluğu keçən il noyabrın 10-da fakt üzrə cinayət işi qaldırıb. Cinayət işi Cinayət Məcəlləsinin 342.2-ci (qulluğa səhlənkar yanaşma – ehtiyatsızlıqdan iki və daha çox şəxsin ölümünə səbəb olduqda, habelə müharibə vaxtı və ya döyüş şəraitində törədildikdə) maddəsi ilə açılıb.

Xatırladaq ki, dövlət sərhədi yaxınlığında uçan Rusiyaya məxsus Mi-24 Azərbaycan hərbiçiləri tərəfindən vurulub. Nəticədə iki ekipaj üzvü həlak olub, bir nəfər yaralanıb. -21D-