Şəhla Hümbətova M.Tramp və M.Pompeonu Ermənistanın dinc əhaliyə qarşı cinayətlərinə biganə qalmamağa çağırıb

Bakı/23.10.20/Turan:  Tanınmış vəkil Şəhla Hümbətova  ABŞ-ın birinci xanımı Melaniya Trampa və ABŞ dövlət katibi Mayk Pompeoya müraciət ünvanlayıb.

Buna səbəb Ermənistan hərbi qüvvələrinin mülki insanları hədəfə alması və qətlə yetirməsidir.             

Vəkil vurğulayır ki, Gəncə sakini Teymur Xaliqov bir gecədə 5 ailə üzvünü, o cümlədən xanımını, körpələrini itirib. Üç yaşlı Xədicə, həmin gecə bütün ailəsini, atasını, anasını, yaşyarımlıq bacısını itirərək tək qalıb.

“Bu ailələr Gəncə sakinləri idilər. Onlar döyüş bölgsindən 100 kilometr uzaqda gecə yatdıqları halda Ermənistan tərəfindən raket atəşinə məruz qalıblar”, - vəkil bildirir.

Daha sonra vəkil əlavə edir ki. Azərbaycan ərazilərinin 20%-i Ermənistan tərəfindən işğal edilib, etnik təmizləmə nəticəsində 20 min nəfərdən çox azərbaycanlı öldürülüb.  Ermənistanın təcavüzü nəticəsində 4 min nəfərə yaxın azərbaycanlı itkin düşüb, 265 nəfər qadın, 67 uşaq, 326 qoca ölüb.

Ş.Hümbətova  vurğulayır ki. BMT Təhlükəsizlik Şurası Azərbaycan ərazilərinin azad edilməsi üçün 4 qətnamə qəbul etsə də 27 ildir i ki, yerinə yetirilmir. 30 il danışıqlar getsə də işğal nəinki bitməyib, əksinə Ermənistan  “yeni ərazi işğalı” bəyanatı yayıb. .

Vəkil vurğulayır ki, sentyabrın 27-dən Azərbaycan ərazisində hərbi əməliyyatlar gedir, 100 minlərlə məcburi köçkün, nəhayət, yurdlarına dönmək istəyir.

Oktyabrın 10-da və 17-də Gəncə iki dəfə raket atəşinə tutulub, 23 nəfər həlak olub, 70-dən çox adam yaralnıb. Bununla birgə Ermənistan tərəf döyüş bölgəsindən 130 kilometr uzaqda yerləşən, 100 minə yaxın sakini olan sənaye şəhəri su qovşağı olan Mingəçeviri raket atəşinə tutur.

“Mən sizi bu faciəyə biganə qalmamağa çağırıram”, - Ş.Hümbətova hər iki şəxsə müraciət edir.

Ş.Hümbətova Azərbaycanda insan hüquqlarının müdafiəsi işindəki xidmətlərinə görə bu ilin martında  ABŞ Dövlət Departamentinin “Qadın cəsarəti”nə görə mükafatını alıb. Mükafatı ona Melaniya Tramp və Mayk Pompeo təqdim ediblər. 05D-