Sentyabrın 12-14-də hərbi eskalasiya zamanı 282 azərbaycanlı hərbçi yaralanıb /YENİLƏNİB/

Bakı/17.09.22/Turan: Sentyabrın 12-14-də Ermənistanla sərhəddə hərbi eskalasiya zamanı Azərbaycan Silahlı Qüvvələrinin 282 hərbi qulluqçusu yaralanıb. Bu barədə Azərbaycan Müdafiə Nazirliyinin şənbə günü yaydığı məlumatda deyilir.

12-14 sentyabr 2022-ci il tarixində Azərbaycan Respublikası Silahlı Qüvvələrinin 282 hərbi qulluqçusu yaralanıb və müxtəlif dərəcəli bədən xəsarətləri alıb.

«12-14 sentyabr 2022-ci il tarixində Ermənistan Silahlı Qüvvələrinin genişmiqyaslı təxribatının qarşısını alarkən Azərbaycan Respublikası Silahlı Qüvvələrinin 282 hərbi qulluqçusu yaralanıb və müxtəlif dərəcəli bədən xəsarətləri alıb.  Onlardan 43 nəfər ilkin tibbi yardımdan sonra ordu sıralarına qayıdıb, 115 nəfərin vəziyyəti kafi, 103 nəfər orta-ağır, 21 nəfərin vəziyyəti isə ağır olaraq qiymətləndirilir”,- məlumatda deyilir.

Bundan əlavə, Ermənistan Silahlı Qüvvələrinin təxribatı nəticəsində Azərbaycan tərəfdən 2 mülki şəxs yaralanıb. Onlardan biri ilkin tibbi yardımdan sonra evə buraxılmış, 1 nəfərin vəziyyəti isə orta-ağır qiymətləndirilir.06В-

*   *   *

2022 Sentyabr 17 (Şəmbə) 14:23:50

Son döyüşlərdə həlak olan azərbaycanlı hərbçilərin sayı 79-a çatıb

Bakı/17.09.22/Turan: Bu gün Azərbaycan Müdafiə Nazirliyi Ermənistan-Azərbaycan sərhədində münaqişənin son eskalasiyası zamanı daha iki nəfərin həlak olduğunu bildirib. İtkinin ümumi sayı 79-a çatıb.

Həlak olanların arasında 43 əsgər, 2 kapitan, 4 baş leytenant, 8 leytenant, 4 baş gizir, 10 gizir, 4 kiçik gizir, 3 baş çavuş və 1 kiçik çavuş var. 06D