Serbiyanın ticarət naziri Ermənistana silah göndərildiyini etiraf edib

Bakı/22.07.20/Turan: Serbiyanın ticarət naziri Rasim Lyaiç bildirib ki, bu il Serbiyanın özəl şirkətlərindən biri Cənubi Qafqaza iki silah partiyası göndərib.

“Serbiyadan silah tədarükü yalnız dörd dövlət strukturunun - XİN, Müdafiə Nazirliyi, DİN və İnformasiya Təhlükəsizliyi Agentliyinin icazəsi ilə mümkündür”, - “Anadolu” agentliyinin Belqraddakı müxbiri nazirdən sitat gətirib.

Nazir təchizatçı şirkətin adını açıqlamayıb, ancaq onu qeyd edib ki,  Ermənistana silah tədarükü may və iyun aylarında baş tutub. Müqavilənin dəyəri ən azı bir milyondan avrodur, o deyib.

Serbiyalı nazir onu da qeyd edib ki, Ermənistana qarşı beynəlxalq sanksiyalar yoxdur və buna görə də Serbiya tərəfi üçün Yerevanın müraciətini qəbul etməmək çətin olub.

Qeyd edək ki, müxtəlif məlumatlara görə, Serbiya Ermənistana müxtəlif çaplı minaatanlar, onlara mərmilər, “Qrad” qurğularının hissələri, müxtəlif minalar və s. göndərib.

Qeyri-rəsmi məlumatlara görə, təchizat dəniz və quru yolu ilə həyata keçirilib.

Tranzit ölkələr sırasında Moldova, Gürcüstan və Rusiyanın adları çəkilir.

Gürcüstan tərəfi ittihamları təkzib edərək bildirib ki, onun ərazisindən silah keçməyib.

Rəsmi Bakı Serbiya hökumətinə iradını bildirib, lakin digər ölkələrlə bağlı bəyanat verilməyib. -02D-