"Sərhədsiz Reportyorlar" Anews.az-ın müxbirini dərhal azad etməyə çağırıb

Bakı/17.03.21/Turan: "Sərhədsiz Reportyorlar" Azərbaycan hökumətini uydurma "ictimai asayişi pozma" ittihamı ilə həbs edilmiş reportyor Zaur Qəmbərovu azad etməyə çağırır.

Anews.az saytının reportyoru olan Qəmbərov 2020-ci il mayın 4-də şikayəti araşdırmaq üçün getdiyi Sosial Müdafiə Departamentinin Gədəbəy şöbəsində baş vermiş mübahisəyə görə fevralın 28-də 3 il yarım müddətinə həbs cəzasına məhkum edilib.

Mübahisə zamanı Sosial Təminat Departamentinin direktor müavini İbrahim Ələsgərov və onun sürücüsü Qəmbərova hücum edib, onu məhkəməyə vermək və həbs etdirməklə hədələyiblər.

Reportyor və təmsil etdiyi veb-sayt hücumdan Əmək və Əhalinin Sosial Müdafiəsi Nazirliyinə müraciət edib, polis isə araşdırma aparacağını bildirib.

Qəmbərov əmindir ki, həbsinə iki gün əvvəl yayımladığı, COVİD-19-a qarşı mübarizədə fərsiz hərəkətlərinə görə rayon hakimiyyətini tənqid etdiyi, habelə Sosial Təminat Departamentinin yerli şöbəsində korrupsiya sistemi haqqında məlumat verdiyi video səbəb olub.

"Məntiqə zidd olaraq Qəmbərov özü hücumda ittiham olunub. Məmur və sürücüsü bildiriblər ki, Qəmbərov onlara hücum etmək üçün stuldan istifadə edib. Amma məhkəmə məmurun və sürücüsünün iddialarını yoxlamaq üçün videomüşahidə kameralarının görüntülərinə baxmaqdan, habelə stuldan barmaq izi götürməkdən imtina edib.

"Vəziyyətdə bu şəkildə dönüş Azərbaycanda jurnalistlərə qarşı zorakılığa görə məsuliyyət daşıyanların cəzasızlığını bir daha nümayiş etdirib”, deyə “Sərhədsiz Reportyorlar”ın Şərqi Avropa və Mərkəzi Asiya şöbəsinin rəhbəri Janna Kavelye bildirib. “Zaur Qəmbərov kiməsə hücum etdiyinə görə həbs edilməyib. O, Gədəbəy rayonunda sosial və iqtisadi problemləri tənqid və ifşa etdiyinə görə həbs edilib. Biz uydurma iş üzrə bu əsassız qərarı pisləyirik və onu dərhal azad etməyə çağırırıq”, deyə təşkilatın bəyanatında bildirilir. -02D-