�Sərhədsiz Reportyorlar� Əfqan Muxtarlının dərhal azad edilməsini tələb edir

Paris/24.09.19/Turan: "Sərhədsiz Reportyorlar" (RSF) beynəlxalq mətbuat azadlığını müdafiə təşkilatı həbsdə aclıq aksiyasına başlayan Azərbaycanlı jurnalist Əfqan Muxtarlının səhhətindən həddindən artıq narahatdır.

Azərbaycan hakimiyyəti onun taleyinə görə məsuliyyət daşıyır və beynəlxalq ictimaiyyət onun dərhal azad edilməsinə nail olmalıdır, bu barədə "Sərhədsiz Reportyorlar"ın bəyanatında deyilir.

Bu məşhur araşdırmaçı jurnalist böyük təhlükədədir, çünki diabet və hipertoniyası olmasına baxmayaraq, sentyabrın 22-də vəkilinin hüquqlarının pozulmasına etiraz əlaməti olaraq aclıq elan edib.

"O, bu aclığın onun həyatını təhlükə altına qoyduğunu bilir, amma ədalətli məhkəməyə ümidi olmamasına baxmayaraq, o, bu addımı atıb", deyə həyat yoldaşı Leyla Mustafayeva bildirib.

Muxtarlı 2017-ci ilin mayında qonşu Gürcüstanda oğurlandıqdan və mühacirətdən məcburi şəkildə qaytarıldıqdan sonra uydurma ittihamla 6 il müddətinə azadlıqdan məhrum edilib. "Biz Əfqan Muxtarlının vəziyyətindən həddindən artıq narahatıq və onun taleyinə görə məsuliyyəti Azərbaycan hakimiyyətinin üzərinə qoyuruq", deyə RSF-nin Şərqi Avropa və Mərkəzi Asiyada üzrə nümayəndəliyinin rəhbəri İohann Bir bildirib.

"Gürcüstanda oğurlanma və həbsdə təqib yolverilməz ədalətsizlikdir. Azərbaycan hökumətini onu dərhal azad etməyə çağırırıq və onun təqibində əli olan hər kəsə qarşı beynəlxalq sanksiyalar tətbiq edilməsi üçün əlimizdən gələni edəcəyik", deyə təşkilatın bəyanatında bildirilir.

Muxtarlı 2017-ci il mayın 29-da Tbilisidə oğurlanıb. O, üç ildir burada yaşayır və Azərbaycanda yüksək səviyyədə korrupsiya haqqında jurnalist araşdırmaları aparırdı. -02D-