"Sərhədsiz reportyorlar" təşkilatının may və avqust hesabatları bir-birindən fərqlənir

Avqustun 1-də Turan agentliyi "Sərhədsiz reportyorlar" təşkilatının "Mətbuat azadlığı indeksi"nin yenilənmiş məlumatlarını dərc edib.

Bu dərc jurnalist- həmkarlar tərəfindən bəzi suallara  səbəb olub. Əsasən, çoxları soruşub ki,  mayın əvvəlində açıqlanmış hesabatı niyə yenidən dərc etmisiniz?

Bununla əlaqədar izah edirik ki, may ayında dərc edilmiş hesabat və onun hazırkı variantı eyni şey deyil.

Mətbuat azadlığı indeksi əslində vəziyyətin onlayn rejimdə qiymətləndirilməsidir. Sənədin özündə bu barədə deyilir:

"İndeks təqvim ili (yanvar-dekabr) ərzində vəziyyəti təsvir edir. Onu dərc edildiyi anda vəziyyətin təsviri kimi qəbul etmək dilməlidir. Odur ki, ölkədə mətbuat azadlığı ilə bağlı vəziyyət qiymətləndirilən ilin sonuna və nəşr tarixinə qədər kəskin şəkildə dəyişirsə, bütün məlumatlar ən son hadisələr nəzərə alınmaqla yenilənir. Bu, yeni müharibə, dövlət çevrilişi, jurnalistlərə böyük hücum və ya qəflətən son dərəcə repressiv siyasətin tətbiqilə əlaqədar ola bilər".

Dünyada saxlanılan və həbs edilən jurnalistlərin sayı barədə statistika deyilənlərin təsdiqidir. Bu gün onların sayı mayın əvvəlində və 2024-cü ilin əvvəlində dərc edilən məlumatlardan fərqlənir. Bu, aşağıdakı kimidir:

Yanvarın 1-i üçün  dünya üzrə həbs edilmiş jurnalistlərin sayı 482 nəfər, media işçilərinin sayı isə 23 nəfər olub. Hazırda həbs olunmuş jurnalistlərin sayı 575, media işçilərinin sayı 28 nəfərdir.

Yuxarıda qeyd edildiyi kimi, mətbuat azadlığı sahəsində bütün mənfi və müsbət dəyişikliklər müntəzəm olaraq indeksə daxil edilir. Bu dəyişikliklərdən asılı olaraq, ümumi tendensiya və ya bu və ya digər ölkədə vəziyyətin qiymətləndirilməsi dəyişə bilər. İndiki halda bizim ölkəmizdə mühüm dəyişikliklər baş verməyib və biz də  bunu qeyd etmişik.