«Şərq Tərəfdaşlığı» videokonfransında İlham Əliyev və Nikol Paşinyan arasında növbəti mübahisə

Bakı/19.06.20/Turan: İyunun 18-də “Şərq Tərəfdaşlığı” ölkələrinin videokonfrans formatında sammiti zamanı Azərbaycan Prezidenti İlham Əliyev və Ermənistanın baş naziri Nikol Paşinyan arasında mübahisə baş verib.

İ.Əliyev öz çıxışında Ermənistan hakimiyyətinin siyasətini tənqid edib, Yerevanı Azərbaycan torpaqlarını işğal etməkdə və münaqişənin sülh yolu ilə həllindən imtina etməkdə ittiham edib.

“Ermənistan beynəlxalq səviyyədə tanınmış Azərbaycan ərazisinin 20%-nin işğalını davam etdirir. Dağlıq Qarabağ və Azərbaycanın daha 7 rayonu 30 ilə yaxındır ki, erməni işğalı altındadır. Ermənistanın apardığı etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkün vəziyyətinə düşüb. BMT Təhlükəsizlik Şurasının 4 qətnaməsi erməni qoşunların Azərbaycanın işğal olunmuş bütün ərazilərindən tam və qeyd-şərtsiz çıxarılmasını tələb edir”, - İ.Əliyev bildirib.

“Danışıqların mahiyyətini və formatını heçə endirməyə çalışan Ermənistan baş nazirinin dediklərinə rəğmən, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa edilməlidir”, - İ.Əliyev qeyd edib.

Nikol Paşinyan buna replika atıb ki, Azərbaycan öz ərazisində ermənilərə qarşı irqçilik siyasəti yürüdüb.

“Ermənini yatarkən balta ilə qətlə yetirmiş və Avropa İttifaqına üzv dövlətin məhkəməsi tərəfindən ömürlük həbs cəzasına məhkum edilmiş Azərbaycan vətəndaşı həmin ölkədən ekstradisiya ediləndən sonra cənab Əliyev

tərəfindən əfv olunub. Bu şəxs Azərbaycanda hər kəs tərəfindən qəhrəman kimi vəsf edilir. Dağlıq Qarabağ erməniləri balta ilə qətlə yetirilməmək üçün özünümüdafiə hüququna malikdir. Üzr istəyirəm, amma hesab edirəm ki, Şərq Tərəfdaşlığı Platforması zorakılığa təhrik etmək üçün deyil. Burada tərəfdaşlığı təşviq etmək lazımdır.

Mən Azərbaycan prezidentini təklif etdiyim konstruktiv məcraya və konstruktiv formula qayıtmağa çağırıram ki, Dağlıq Qarabağ münaqişəsinin həlli Dağlıq Qarabağ, Ermənistan və Azərbaycan xalqları üçün məqbul olmalıdır”,- Paşinyan deyib.

Sonra İlham Əliyev yenə də söz alaraq deyib: “Öz çıxışımda dediklərim beynəlxalq təşkilatların qətnamələrinə əsaslanan tarixi həqiqətdir. Birincisi, bu,

hər kəsə bəlli olan bir faktdır ki, Ermənistan Azərbaycanın ərazisini işğal edib. İkincisi isə Ermənistanın baş nazirinə irqçilik haqqında danışmağı məsləhət görməzdim, çünki erməni terrorçuları dünyaca məşhurdurlar. Parisin Orli hava limanında terror hadisəsi törədən Karapetyan soyadlı şəxs sonradan Ermənistana

ekstradisiya edilib və Ermənistan prezidenti tərəfindən əfv olunub. Məhz buna görə belə məsələlər ətrafında müzakirə gedəndə ona sakit oturmağı tövsiyə edərdim”. Bununla da çıxışımı bitirirəm”, - İ.Əliyev qeyd edib.-02D-