Şeyxülislam İstanbul Patriarxını Qarabağa səfərə dəvət edib

Bakı/02.04.21/Turan: Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə İstanbul Patriarxı Varfolomeyi və Mitropolit Emanueli Qarabağdakı məscid və kilsələri birlikdə ziyarət üçün Azərbaycana səfərə dəvət edib. Bu barədə Qafqaz Müsəlmanları İdarəsinin mətbuat xidmətinin aprelin 2-də yaydığı məlumatda deyilir.

Məlumata görə, Şeyxülislam Patriarx Varfolomeylə 2021-ci il aprelin 1-də KAİCİİD Beynəlxalq Dialoq Mərkəzinin sessiyası çərçivəsində İstanbulda görüşüb.

Məlumatda vurğulanır ki, bu görüşdə bir çox məsələlər, o cümlədən 30 ilə yaxın Ermənistan işğalında qalmış ərazilərdəki məscid və ziyarətgahların vəziyyəti də müzakirə obyekti olub.

Qafqaz Müsəlmanları İdarəsinin sədri işğal dövründə abad Azərbaycan şəhərlərinin xarabaya döndərildiyini, ümumbəşər əhəmiyyətli tarixi, dini, mədəni abidələrin, ziyarətgahlaın, qəbirstanlıqların, İslam, xristian və yəhudi məbədlərininin məhv edildiyini Patriarx Varfolomeyin diqqətinə çatdırıb.

Məlumatda deyilir ki, Paşazadə məscidlərin həqarətə məruz qaldığını da bildirib: “Halbuki, bütün bu illər ərzində Azərbaycanın paytaxtı Bakı şəhərinin mərkəzində erməni kilsəsi təmir edilərək abad şəkildə qorunub saxlanılmaqdadır”, deyə o bildirib.

Şeyxülislam İkinci Qaranbağ müharibəsində işğaldan azad edilmiş Qarabağda bütün dinlərin əmin-amanlıq şəraitində yaşamağa davam etməsini Azərbaycan dövlətinin təmin edəcəyiini vurğulayıb. -05D-