Siyavuş Novruzov SQ-yə parlament və vətəndaş nəzarətinin əleyhinədir

Bakı/15.12.17/Turan: Dekabrın 15-də parlamentin plenar iclasında "Silahlı Qüvvələr haqqında" yeni qanun layihəsinin müzakirəsi zamanı müdafiə nazirinin hərbiçi və ya mülki şəxs olması ilə bağlı mübahisə yaranıb.

"Hesab edirəm ki, ordunun başında peşəkar hərbiçi durmalıdır. Çünki ölkəmiz müharibə vəziyyətindədir. Bəzi ölkələrdə müdafiə naziri mülki şəxsdir, buna görə bizdə də bəziləri bunun lehinə çıxır.

Amma müharibə vəziyyətində olan ölkənin qanununda belə bir norma olmamalıdır", deyə hakim Yeni Azərbaycan Partiyasının icraçı katibinin müavini Siyavuş Novruzov bildirib.

Daha sonra o bildirib ki, mətbuat ordu haqqında hərbiçilərin öz rəsmi məlumatlarından başqa məlumatlar dərc etməməlidir.

Novruzov həmçinin orduya parlament və vətəndaş nəzarətinə qarşı çıxıb.

O, çoxmənalı şəkildə silahlı qüvvələrə nəzarətin Ali Baş Komandan tərəfindən həyata keçirildiyini bildirib.

Öz növbəsində, deputat Qüdrət Həsənquliyev KİV tərəfindən ordunun fəaliyyətinin yalnız rəsmi məlumatların dərc edilməsi ilə məhdudlaşması ideyasına qarşı çıxıb.

Onun fikrincə, peşəkar mətbuat və jurnalistlər SQ haqqında yazmalıdır.

Mətbuat ordudakı problemlər haqqında yazmasa, bu problemlər yalnız artacaq.

Müdafiə nazirinin müavini Kərim Vəliyev qeyd edib ki, mətbuat ordunun fəaliyyətini işıqlandırarkən diqqətli olmalıdır.

"Bu, çox həssas məsələdir. Biz müharibə şəraitindəyik.

İstənilən mənfi hal düşmən təbliğatında bizə qarşı işləyəcək", deyə hərbi idarənin nümayəndəsi bildirib.

Bu gün "Silahlı Qüvvələr haqqında" qanun layihəsi ikinci oxunuşda qəbul edilib. -16D06-