Şoyqu: "Qərb Rusiyanı Cənubi Qafqazda sıxışdırmaq istəyir"

Bakı/25.05.23/Turan: Qərb Dağlıq Qarabağ ətrafında vəziyyətə hər vəchlə müdaxilə etməyə, öz iştirakını genişləndirməyə və Rusiyanın sülhyaratma siyasətini gözdən salmağa çalışır. Bu barədə Rusiyanın müdafiə naziri Sergey Şoyqu mayın 25-də Minskdə Kollektiv Təhlükəsizlik Müqaviləsi Təşkilatı  ölkələrinin Müdafiə Nazirləri Şurasının iclasında bildirib.

Onun sözlərinə görə, Qərb Qarabağda "öz iştirakını genişləndirməyə və regionda təhlükəsizliyi təmin edən Rusiya sülhməramlılarını nüfuzdan salmağa" çalışır.

Şoyqu güman edir ki, Qərb üçün əsas olan "Rusiyanı Cənubi Qafqazda sıxışdırmaqdır, uzunmüddətli perspektivdə regionda təhlükəsizliyi və rifahı təmin etmək deyil", - RİA-Novosti rusiyalı nazirdən sitat gətirir.

Şoyqu qeyd edib ki, buna misal olaraq Ermənistanda Avropa İttifaqının hərbi qulluqçuların və xüsusi xidmət orqanları əməkdaşlarının daxil olduğu mülki missiyasını göstərmək olar.

"Bununla əlaqədar regiona Kollektiv Təhlükəsizlik Müqaviləsi Təşkilatı missiyasının göndərilməsi istiqamətində işlərin davam etdirilməsini zəruri hesab edirik", - o deyib.

Xatırladaq ki, bir gün öncə ilk dəfə olaraq Ermənistanın baş naziri Nikol Paşinyan ölkənin Kollektiv Təhlükəsizlik Müqaviləsi Təşkilatından çıxmasının mümkünlüyünü bildirib. Onun sözlərinə görə, Ermənistanın bu strukturda iştirakı ölkənin təhlükəsizliyinə zəmanət vermir və Yerevan başqa variantları nəzərdən keçirir. 02D