"Şuşa mədəniyyət paytaxtıdır, məmurların paytaxtı deyil", İlham Əliyev

Bakı/01.02.21/Turan: Azərbaycan prezidenti İlham Əliyev əsassız olaraq Şuşada öz qurumlarının nümayəndəliklərini və şəxsi iqamətgahlarını açmaq niyyətlərinə görə yüksək vəzifəli məmurları kəskin tənqidə məruz qoyub.

Belə ki, o, AzTV dövlət telekanalına müsahibəsində o, Mərkəzi Bankın sədri Elman Rüstəmovun Şuşada bu qurumun filialını açmaq ideyasını mənfi qiymətləndirib.

 "Mənim buna münasibətim mənfidir. Bu, özbaşınalıqdır. Belə açıqlama veriləndə mütləq rəhbərliklə gərək məsləhətləşmə aparılsın", deyə Əliyev bildirib.

Onun sözlərinə görə, azad edilmiş ərazilərlə bağlı bütün təkliflər və təşəbbüslər Prezident Administrasiyasının rəhbərinin rəhbərlik etdiyi Qərargaha təqdim edilməlidir.

"Biz kim necə istəyir o torpaqları, əraziləri bərpa edə bilmərik. Biri filial açmaq istəyir, biri nə bilim başqa qurum açmaq istəyir. Bu, yolverilməzdir və qəbuledilməzdir", deyə Əliyev qeyd edib.

O bildirib ki, başqa yüksək vəzifəli məmurlar da Şuşada regional nümayəndəliklərin açılması xahişi ilə ona müraciət ediblər.

"Onların hər halda ağlı çatıb mənə müraciət etməyə və mən onlara dedim ki, gedin oturun yerinizdə. Onları da mən deyə bilərəm, sadalaya bilərəm, qoy Azərbaycan vətəndaşları bilsinlər", deyə Əliyev qeyd edib.

Onun sözlərinə görə, "Azəravtoyol" və AZAL dövlət şirkətlərinin rəhbərləri, Dövlət Gömrük Komitəsinin sədri, FHN başçısı və Sərhəd Xidmətinin rəisi ona müraciət edib.

Əliyev Şuşada gömrük komitəsinin nümayəndəliyinin və sərhəd zastavasının açılması təkliflərini absurd adlandırıb, belə ki, şəhər sərhəddə yerləşmir.

Əliyevin sözlərinə görə, məmurlar Şuşada şəxsi maraqlarını güdürlər.

"Yenə də gəlim, oturum, yerləşim, iqamətgah qurum, hamısı da dövlət hesabına! "Mənim də burada bir rezidensiyam olsun". Mən bəzən bu şeyləri demirəm vətəndaşlara ki, o vətəndaşları iyrəndirməyim, bağışlayın sözümə görə, ifadəmə görə. Amma mənim də artıq səbrim tükənir və deyirəm ki, vətəndaşlar da bilsinlər, bu məmurlar da bilsinlər. Məmurlar öz yerlərini bilsinlər. Mən Şuşanı mədəniyyət paytaxtı elan etmişəm, məmurlar paytaxtı elan etməmişəm. Hərə otursun yerində, öz işi ilə məşğul olsun, məni də əsəbləşdirməsin", deyə Əliyev qeyd edib.

O qeyd edib ki, Şuşanın ərazisi cəmi 300 hektardır və orada plansız tikinti yolverilməzdir.

"Şuşanın ərazisinin ölçüsü 300 hektardır. Mən qoymamışam ki, bir dənə daş daş üstə qoyulsun. Çünki birinci təhlil aparmalıyıq. Ondan sonra o tarixi binaları bərpa etməliyik", deyə Əliyev bildirib.

"Xruşovka"lara gəlincə, Əliyevin şəxsi fikrinə görə, onlar köhnəlib, onların yerində müasid 4-5 mərtəbəli binalar tikilməlidir.

"Mən sadəcə olaraq öz fikirlərimi bölüşürəm, amma necə olacaq, onu mütəxəssislər deyəcək, memarlar, tarixçilər, şuşalılar özləri, onlar necə bu şəhəri görmək istəyirlər, çünki bu, onların şəhəridir", deyə Əliyev bildirib.

O qeyd edib ki, bərpa işlərinə ictimai nəzarət olmalıdır. "Olmasa bax bilin, yenə də eybəcər binalar tikiləcək, torpaqlar zəbt ediləcək, hərə özü üçün bir obyekt tikəcək", deyə Əliyev qeyd edib. -06D-