Talıbov klanının təmizlənməsi davam edir

Bakı/30.12.22/Turan: Naxçıvan Muxtar Respublikası Ali Məclisinin keçmiş sədri Vasif Talıbovun qardaşı Məhərrəm Talıbov “öz xahişilə” Naxçıvan prokurorunun müavini vəzifəsindən azad edilib və o, prokurorluq orqanlarından kənarlaşdırılıb. Bu barədə Baş Prokurorluğun mətbuat xidməti bildirib.

Xatırladaq ki, Vasif Talıbov 27 il Naxçıvan bölgəsinə rəhbərlik etdikdən sonra dekabrın 21-də istefa verib.

İstefa Dövlət Təhlükəsizliyi Xidmətinin Naxçıvanda apardığı yoxlamalardan sonra 3 yüksək vəzifəli məmurun həbsilə eyni vaxta təsadüf edib.

Həbs edilənlər 488 milyon manat dövlət vəsaitini mənimsəməkdə ittiham olunurlar.

Dekabrın 22-də prezident İlham Əliyev Fuad Nəcəflini Naxçıvanda səlahiyyətli nümayəndə  təyin edib.

Bundan sonra Talıbovun qohumlarının işdən çıxarılması davam edib. Hazırda onun böyük oğlu, Azərbaycan Miqrasiya Xidmətinin sədr müavini Rza Talıbov yüksək vəzifədə qalır. 03B