Tehran İrandan tranzitlə Ermənistana hərbi yüklərin daşınması haqqında məlumatları təkzib edir

Bakı/30.09.20/Turan: İranın Prezident Administrasiyasının rəhbəri Mahmud Vaezi Ermənistana İran ərazisi üzərindən silah daşınması haqqında məlumatları təkzib edib.

Azərbaycan baş nazirinin müavini Şahin Mustafayevlə telefon söhbətində o bildirib ki, bu şaiyələr İran və Azərbaycan arasındakı yaxşı münasibətlərin pozulmasına yönəlib.

“Azərbaycan Respublikası İran İslam Respublikasının xarici siyasətində xüsusi yerə malikdir və Tehran Bakı ilə münasibətlərinin möhkəmləndirilməsi və inkişaf etdirilməsi üçün bütün fürsətlərdən istifadə edir”, deyə İRNA agentliyi Vazeidən sitat gətirir.

Xatırladaq ki, dünən İran-Azərbaycan sərhədində bir qrup İran azərbaycanlısı Ermənistana gedən yük maşınlarının qarşısını kəsib. Etirazçıların iddiasına görə, yük maşınlarında İrandan tranzitlə daşınan silah var idi. Etirazçılar bəzi avtomobilləri yandırıblar. -02D-