Təkcə Ukrayna deyil, Rusiya da cənubda hücuma hazırlaşır

Bakı/30.07.22/Turan: Rusiya mənbələrinin məlumatına görə, Rusiya Ukrayna qüvvələrinin əks hücumunu gözlədiyi üçün qüvvələri Herson istiqamətində cəmləşdirir. 

"İnsayder" Telegram kanalının verdiyi məlumata görə, Hersonun şimal-qərbinə tank və döyüş sursatları cəmləşdirilir. Eyni zamanda, Krımda 32 diversiya-kəşfiyyat qrupu yaradılır. Onlar desantçılarla birlikdə Nikolayev və Dnepropetrovsk vilayətləri ilə sərhədə göndərilir. 

106-cı Tula HDQ diviziyasının bu regiona köçürülməsinə hazırlıq gedir, diviziyanın zabitləri artıq regiona gəliblər.

Cənub istiqamətində ümumi sayı 8500 nəfərə yaxın olan 14-15 batalyon-taktiki desant qrupu cəmləşdirilib. Onların sayını 11 min nəfərə çatdırmaq planlaşdırılır.

Təkcə son bir həftə ərzində Mariupoldan Yeni Kaxovkaya altı batalyon-taktiki desant qrupu köçürülüb. Melitopoldan Hersona ponton keçidlərinin təşkili üçün qoşunlar göndərilir. Cənubi Buq çayının gücləndirilməsi üçün artıq iki taktiki mühəndis-istehkamçı qrupu buradadır.

Cidd-cəhdlə yeni artilleriya diviziyaları formalaşdırılır. Belə ki, 16 ədəd iriçaplı 207 mm-lik "Pion" sistemləri gətirilib. Bununla yanaşı, döyüş sursatları anbarları artıq bir yerdə cəmləşdirilmir. 

Belə bir nəticə çıxarmaq olar ki, RF-nin qrupu müdafiə deyil, hücum qrupudur. Onun iki hərəkət istiqaməti var - Nikolayev və Krivoy Roq.

Cənub rusların zərbə endirəcəyi əsas istiqamət olacaq, Donbass da daxil olmaqla, digər hissələrdə onlar "fəal müdafiəyə" keçəcəklər, nəşr belə hesab edir. 02B