Ter-Petrosyanın müavini etiraf edib ki, Yerevan Şuşaya hücum ərəfəsində yalan söyləyirmiş

Bakı/14.09.23/Turan: 1992-ci ilin mayında Şuşa şəhərinin işğal edilməsi əməliyyatı ərəfəsində Ermənistan hakimiyyəti dünya ictimai rəyini azdırmaq məqsədilə ideoloji hazırlığa başlamışdı. Bu məqsədlə Yerevan Qarabağın muxtariyyətinə razı olması barədə bir sıra bəyanatlar vermişdi. Bunu Levon Ter-Petrosyanın komandasının keçmiş  üzvü və onun sağ əli Levon Zurabyan etiraf edib.

O, özünün Facebook səhifəsində yazır: "1992-ci ilin martında Ter-Petrosyan Rusiyanın "Komsomolskaya pravda" qəzetinə bildirdi ki, Dağlıq Qarabağın tam muxtariyyəti "həm Qarabağ, həm də Azərbaycan üçün məqbul" ola bilər. Mən artıq bu bəyanatı 2010-cu ildə, o zamankı hakimiyyət tərəfindən ittiham kimi irəli sürüləndə şərh etmişəm. Bu bəyanatdan iki ay sonra biz Şuşanı azad etdik.

Mən deyirdim ki, bu hərbi hərəkət artıq hazırlanıb, bəyanat isə hərbi əməliyyatların informasiya təminatının tərkib hissəsi kimi səsləndirilib. Daha çox danışmaq üçün dövlət sirlərini açmalıyam və təbii ki, mən bunu etməyəcəm”.

Zurabyanın dediklərinə əlavə edək ki, mayın 7-də o zamankı prezident Levon Ter-Petrosyan Tehrana gedib və orada "dövlət başçılarının birgə bəyanatını" imzalayıb.

İran prezidenti Əkbər Haşimi Rəfsəncaninin vasitəçiliyilə hazırlanmış bu sənədi Azərbaycan prezidentinin səlahiyyətlərinin icraçısı Yaqub Məmmədov və Ermənistan prezidenti Levon Ter-Petrosyan imzalamışdılar.

Sənəd Ermənistanla Azərbaycan arasında silahlı münaqişənin dayandırılmasını nəzərdə tuturdu, bütün mübahisəli məsələlər isə ATƏT və Birləşmiş Millətlər Təşkilatı Nizamnaməsinin prinsipləri əsasında tənzimlənməliydi. Bundan əlavə, tərəflər regionda bütün kommunikasiyaların açılması barədə razılığa gəlmişdilər. Lakin bir neçə saatdan sonra, mayın 8-nə keçən gecə ermənilər Şuşaya hücum etdilər və ertəsi gün şəhər işğal edildi.

İndiyədək Ermənistan hakimiyyəti iddia edirdi ki, bu əməliyyata icazə verməyib, hətta buna qarşı çıxıb, ancaq guya Qarabağ erməniləri bu əməliyyatı öz təşəbbüslərilə həyata keçiriblər. 0