TRACECA tədbirində azərbaycanlı və erməni nazirlər arasında mübahisə yaranıb

Bakı/06.12.19/Turan: Dekabrın 6-da Bakıda TRACECA layihəsi üzrə hökumətlərarası komissiyanın iclasında Azərbaycanın iqtisadiyyat naziri Mikayıl Cabbarov ilə Ermənistanın ərazi idarəetmə nazirinin müavini Armen Simonyan arasında mübahisə yaranıb.

Belə ki, Simonyan öz çıxışında bildirib ki, iclasın proqramına daxil olan bəzi tədbirləri anlamır. Əsasən ona maraqlı olub ki, konfrans iştirakçıları niyə Bakıdakı Fəxri Xiyabanı  (Heydər Əliyevin məzarını ziyarət -red.) ziyarət etməlidirlər?

Bu suallar M.Cabbarovun qəzəbinə səbəb olub. O deyib ki, TRACECA layihəsi həmçinin Heydər Əliyevin fəal işinin sayəsində mümkün olub. M.Cabbarovun sözlərinə görə, Azərbaycan tərəfi tədbirin mədəni proqramını tərtib edərkən bunu nəzərə alıb.

Hücuma keçən M.Cabbarov erməni tərəfini Yerevanda Njde Gareginə abidə qoymaqda günahlandırıb. O, Ermənistan nümayəndə heyətini Yerevanın tarixi ilə tanış olmaq üçün Heydər Əliyev Mərkəzinə dəvət edib.

“İrəvan xanlığının tarixi, İrəvan şəhərinin yaranma tarixi haqqında heç yerdə oxuya bilməyəcəyiniz bir çox yeni şey öyrənəcəksiniz”, - o  deyib.-02D-