Trampın milli təhlükəsizlik üzrə müşaviri Qarabağda skandinaviyalı sülhməramlıların yerləşdirilməsindən danışıb

Bakı/31.10.20/Turan: ABŞ prezidentinin milli təhlükəsizlik üzrə müşaviri Robert O'Brayen dünən Los-Ancelesin erməni icması ilə görüşündə gözlənilmədən bəyan edib ki, ABŞ “Qarabağda Skandinaviya sülhməramlıları”nın yerləşdirilməsi barədə razılığa gəlmək istəyir. Bu barədə BBC bildirir.

“Biz hesab edirik ki, hər iki tərəf Skandinaviya sülhməramlılarının yerləşdirilməsilə razılaşmalıdır və biz regionda yerləşə və barışığa dəstək ola biləcək sülhməramlı qüvvələrin yaradılması ilə bağlı Skandinaviya hökumətləri ilə işləyirik”, - Robert O'Brayen deyib. Onun çıxışını HorizonArmenian TV erməni kanalı  Facebook-da dərc edib.

Hələlik nə müharibə tərəflərindən, nə beynəlxalq vasitəçilərdən, nə də Skandinaviya ölkələrindən şərh yoxdur.

Hələlik Azərbaycan sülhməramlıların yeridilməsinə razı deyil, bu məsələdə həlledici söz onundur, çünki beynəlxalq tanınmış ərazilərində müharibə gedir.

Üç gündən sonra ABŞ-da prezident seçkiləri keçiriləcək. ABŞ-da erməni əslli seçicilər kifayət qədər çoxdur.—0-