Türkiyə Parlamenti Ermənistanı qınayıb və Azərbaycana dəstək ifadə edib

Bakı/17.07.20/Turan: Türkiyə Böyük Millət Məclisinin (Parlamentinin) dörd fraksiyası birgə bəyanatlarında Ermənistan SQ-nin iyulun 12-dən etibarən Azərbaycanın Tovuz rayonu istiqamətində davam edən təxribatlarını və hücumlarını qətiyyətlə pisləyib. “Anadolu” Agentliyinin məlumatına görə, sənədi hakim Ədalət və İnkişaf Partiyası (Ak Parti), Cümhuriyyət-Xalq Partiyası (CHP), Milliyyətçi Hərəkat Partiyası (MHP) və Yaxşı Partiya (İyi Parti) imzalayıb.

“Ermənistan yanlış yoldadır. İllərdir Azərbaycan torpağı olan Dağlıq Qarabağı və ona bitişik Azərbaycan rayonlarını işğal altında saxlayan Ermənistanın məşhur təcavüzkar mövqeyinin yeni göstəricisi olan bu hücumlar Cənubi Qafqazda dayanıqlı sülh və sabitlik yolunda ən böyük maneədir”, deyə bəyanatda bildirilir.

Müəlliflər beynəlxalq ictimaiyyəti Ermənistanın qanunsuz əməllərinə lazımi şəkildə reaksiya verməyə çağırıblar. “Biz Dağlıq Qarabağ münaqişəsinin Azərbaycanın beynəlxalq səviyyədə tanınmış sərhədləri və ərazi bütövlüyü çərçivəsində sülh yolu ilə həllinə dəstəyimizi ifadə edirik”, deyə bəyannamədə qeyd edilir.

Türkiyə Parlamenti vurğulayır ki, Ermənistan BMT Təhlükəsizlik Şurasının və ATƏT-in müvafiq qətnamələrini yerinə yetirməli və öz qüvvələrini Azərbaycanın işğal edilmiş ərazilərindən çıxarmalıdır.

““İki dövlət, bir millət” prinsipinə əsaslanan Türkiyə bütün imkanları ilə Azərbaycanın ərazi bütövlüyünün bərpası üzrə səylərini dəstəkləyəcək”, deyə müraciətdə bildirilir. Türkiyəli deputatlar Ermənistan SQ-nin təxribatı nəticəsində hərbiçilərin və mülki şəxslərin həlak olması ilə əlaqədar qardaş və dost Azərbaycan xalqına başsağlığı verirlər. -02D-