Türkiyədə Putinlə İstanbulda görüşməyə hazır olduqlarını bildiriblər

Bakı/05.03.22/Turan: Ukrayna Prezidenti Vladimir Zelenski Türkiyə Prezidenti Rəcəb Tayyib Ərdoğanla telefon danışığı zamanı Rusiya lideri Vladimir Putinlə İstanbulda və ya Ankarada görüşməyə hazır olduğunu bildirib. Bu barədə Türkiyə prezidentinin nümayəndəsi İbrahim Kalın bildirib.

Onun sözlərinə görə, Ərdoğan artıq Putinə Zelenskinin niyyətini çatdırıb. "Biz bu istiqamətdə işimizi davam etdirəcəyik. Belə bir görüşün keçirilməsi, şübhəsiz ki, vəziyyətə müsbət təsir göstərəcəkdir. Türkiyə öz töhfəsini verməyə hazırdır", - deyə Kalın qeyd edib.

Prezident nümayəndəsi həmçinin qeyd edib ki, Türkiyə lideri bazar günü rusiyalı həmkarı ilə gözlənilən danışıqlar zamanı Ankaranın Ukrayna böhranının nizamlanmasına dair təkliflərini səsləndirəcək.

"Türkiyə hazırda Rusiya və Ukrayna ilə eyni vaxtda danışa bilən azsaylı ölkələrdən biridir. Prezidentimizin sözlərini təkrar edirəm, biz Rusiyadan, yaxud Ukraynadan imtina edə bilmərik. Buna görə də biz tərəfləri danışıqlar masası arxasına əyləşdirmək üçün hansı addımları ata biləcəyimizə diqqət yetiririk, lakin Rusiya tərəfini burada xüsusilə inandırmağa çalışırıq", — deyə Kalın qeyd edib.

Daha əvvəl Ərdoğanın nümayəndəsi bildirib ki, Türkiyənin Rusiyaya qarşı sanksiyaların tətbiqi ilə bağlı planları yoxdur və Ankara Ukrayna münaqişəsində kiminsə tərəfini tutmaq istəmir. Kalının sözlərinə görə, Ankara ölkə iqtisadiyyatının bundan zərər görməsini istəmir.

Kalın Vladimir Putinlə Türkiyə liderinin mümkün danışıqlarının tarixini açıqlayıb. Onun sözlərinə görə, siyasətçilərin telefon danışıqları martın 6-da planlaşdırılır. Prezidentin nümayəndəsi hərbi əməliyyatların dərhal dayandırılmasının vacibliyini bəyan edib və münaqişə tərəflərini danışıqlar masasına əyləşməyə çağırıb.—0—