Türkiyədə yanğına qarşı mübarizə aparan Azərbaycan yanğınsöndürənlərinin sayı 710 nəfərə çatdırılacaq

Bakı/06.08.21/Turan: Bu gün Azərbaycan və Türkiyə prezidentləri İlham Əliyev və Rəcəb Tayyib Ərdoğan arasında telefon söhbəti baş tutub.

Azərbaycan prezidentinin mətbuat xidmətinin məlumatına görə, Əliyev Türkiyənin müxtəlif bölgələrində baş vermiş güclü meşə yanğınları nəticəsində insanların həlak olması ilə əlaqədar Prezident Rəcəb Tayyib Ərdoğana bir daha başsağlığı verib.

Ərdoğan öz növbəsində başsağlığına və meşə yanğınlarının ilk günlərindən Azərbaycanın yanğınların söndürülməsində Türkiyəyə göstərdiyi dəstəyinə görə təşəkkürünü bildirib.

Əliyev əlavə 40 ədəd yanğınsöndürən maşının artıq yola çıxdığını və sabah yanğın zonasına yetişəcəyini qeyd edərək, ərazidə xidmət göstərən yanğınsöndürən maşın və texnikanın sayının 93-ə çatacağını bildirib.

Yanğın zonasında Azərbaycandan ümumilikdə 510 nəfər yanğınsöndürən fəaliyyət göstərir.

 Azərbaycan prezidenti əlavə 200 nəfər xüsusi təlim keçmiş yanğınsöndürən heyətinin də göndərilməsini təklif edib və beləliklə, Azərbaycandan olan yanğınsöndürən heyətinin sayının 710 nəfərə çatdırılacağını deyib.

Ərdoğan bu əlavə dəstəyə görə təşəkkürünü bildirib və bu dəstəyin Azərbaycan ilə Türkiyənin qardaşlığının və dostluğunun bariz təcəssümü olduğunu diqqətdə çatdırıb.

Söhbət zamanı prezident İlham Əliyev Ermənistan-Azərbaycan sərhədində Ermənistan tərəfindən törədilən təxribatlar barədə Ərdoğana məlumat verib və Azərbaycan Ordusunun Ermənistanın bu kimi təxribatlarına layiqli cavab verdiyini vurğulayıb.

Dövlət başçıları söhbət əsnasında postmünaqişə dövründə gedən regional proseslər barədə geniş fikir mübadiləsi aparıblar. -06D-