Türkiyənin XİN başçısı Azərbaycanlı və Rusiyalı həmkarları ilə danışıqlar aparıb

Bakı/28.10.20/Turan: Oktyabrın 28-də Türkiyə və Azərbaycan XİN başçıları – Mevlut Çavuşoğlu və Ceyhun Bayramov arasında telefon danışığı baş tutub, bu barədə Türkiyə XİN məlumat yayıb.

Söhbət zamanı Qarabağ münaqişəsi ilə bağlı vəziyyət müzakirə olunub.

Dünən isə Çavuşoğlu RF XİN başçısı Sergey Lavrovla telefonla danışıb. Tərəflər Yaxın Şərq regionundakı vəziyyəti ətraflı müzakirə ediblər.

Liviya ilə bağlı aparıcı siyasi qüvvələrin və birliklərin iştirakı ilə hərtərəfli dialoq qurulmasında hər iki tərəfin maraqlı olduğu təsdiq edilib.

Fəal ikitərəfli əlaqələri, o cümlədən xarici işlər nazirlikləri, hərbi idarələr və xüsusi xidmətlər xətti ilə, Suriyada vəziyyətin nizamlanmasına və BMT TŞ-nin əsas qətnamələri və Astana formatının iştirakçıları arasında razılaşmalar məcrasında siyasi prosesin təşviqinə şərait yaradılması üzrə əlaqələri davam etdirmək barədə razılığa gəlinib.

Həmçinin, Dağlıq Qarabağla bağlı vəziyyət müzakirə olunub. Ermənistan və Azərbaycan arasında davamlı atəşkəsin ən qısa zamanda təmin edilməsi zərurəti vurğulanıb.

Nazirlər problemin sülh yolu ilə həllinin alternativinin olmadığını, atəşkəs rejiminin dərhal bərqərar edilməsi və ATƏT-in Minsk Qrupunun hazırladığı mexanizmlər çərçivəsində danışıqlar prosesinin bərpa edilməsi zərurətini qeyd ediblər. Böhrana xarici döyüşçülər cəlb edilməklə onun beynəlmiləlləşdirilməsinin yolverilməz olduğu xüsusi olaraq vurğulanıb. -16D-