Ukrayna bayrağının rəngləri altında Avropa Günü

Bakı/13.05.22/Turan: Tərəfdaşlıq haqqında yeni saziş Avropa İttifaqı və Azərbaycan arasında münasibətləri yeni səviyyəyə qaldıracaq. Bu barədə Aİ-nin Bakıdakı missiyasının rəhbəri Peter Mixalko cümə axşamı Avropa Günü mərasimində çıxışında bildirib. 

Bu gün Avropa İttifaqı ölkələri Azərbaycanda çoxsaylı şirkətlərlə təmsil olunur, bu şirkətlər çox sayda strateji infrastruktur layihələri və digər iqtisadi layihələr həyata keçirir, deyə o qeyd edib.

Aİ Azərbaycana azad edilmiş ərazilərin bərpasında və minatəmizləmə işlərində kömək edir. Eyni zamanda, Avropa İttifaqı rəhbərliyi regionda sülh və sabitliyin bərpa edilməsi üçün fəal sülhyaratma siyasəti həyata keçirir. Avropa İttifaqı Şurasının sədri Şarl Mişelin Azərbaycan və Ermənistan liderlərinin görüşlərini təşkil etmək təşəbbüslərini qeyd etmək kifayətdir, deyə diplomat bildirib.

Avropa İttifaqı "Rusiyanın təcavüzünə" qarşı mübarizə aparan Ukrayna xalqına verdiyi dəstəyə görə Azərbaycana minnətdardır və Cənub Qaz Dəhlizi vasitəsilə Avropanın enerji təhlükəsizliyinin təmin edilməsi üzrə addımlarına görə mütəşəkkirdir, deyə Mixalko qeyd edib. O, avropalıların Ukraynanın suverenliyinin qorunması üzrə haqq işinə fəal dəstək göstərdiyini vurğulayıb.

Onun sözlərinə görə, Avropa İttifaqı Azərbaycanın vətəndaş cəmiyyəti ilə də işi davam etdirmək, sıravi vətəndaşlarla mədəniyyət, təhsil və səhiyyə sahəsində əlaqələri inkişaf etdirmək niyyətindədir. Sonda o, Azərbaycan xalqına uğur və firəvanlıq arzu edib. 

Qeyd edək ki, mərasimdə iştirak edən bir çox Avropa diplomatları sinələrinə üzərində Ukrayna bayrağı olan döş nişanı taxmışdı, Avropa səfirlərinin bir çoxunun həyat yoldaşları isə Ukrayna bayrağının rənglərinə uyğun mavi rəngli paltar geyinmiş və sarı şərf taxmışdı. -02B-