USAID-in Azərbaycan üzrə yeni missiya direktoru vəzifələrinin icrasına başlayıb

Bakı/16.07.18/Turan: Dr. Caydev "Cey" Sinqx (Jaidev "Jay" Singh) ABŞ Beynəlxalq İnkişaf Agentliyinin (USAID) Azərbaycan üzrə missiyasının yeni direktoru qismində öz vəzifələrini icra etməyə başlayıb. Dr. Sinqx Azərbaycanın qarşıya qoyduğu prioritetlərə dəstək göstərən proqramlara rəhbərlik edəcək. Cənab Sinqx gələcək illərdə USAID-in Azərbaycanla əməkdaşlığına dair müsbət və iddialı baxışa malikdir. "Bizim azərbaycan xalqı ilə möhkəm dostluğumuz var. Regionda inkişaf lokomotivi ola biləcək sabit və firavan Azərbaycan uğrunda dostluğumuzu və tərəfdaşlığımızı gücləndirməyi ümid edirəm. Əsas prioritetlərdən biri iqtisadi və siyasi tərəfdaşlığımızı dərinləşdirmək üçün hər iki ölkədə özəl sektorla işləmək olacaq", Dr. Sinqx qeyd edib.

Bu vəzifəyə təyin olunmazdan əvvəl, xarici diplomatik xidmət əməkdaşı olan cənab Sinqx təşkilatın Vaşinqtondakı baş ofisində və digər ölkələrdəki missiyalarda aparıcı vəzifələrdə çalışaraq inkişaf və humanitar məqsədlərə nail olmaq üçün ikitərəfli və çoxtərəfli inkişaf tərəfdaşları ilə strateji mühüm olan əlaqələrə rəhbərlik edib. O, Mali, Bosniya və Hersoqovina, Yaponiya, Cənubi Sudan, Cibuti, Kenya və Əfqanıstanda müxtəlif vəzifələrdə işləyib.

Cənab Sinqx həyat yoldaşı Kristin Sinqxlə birgə gəlib - o, Bakıdakı ABŞ səfirliyində çalışacaq. Onların iki övladı var - onlardan biri Moldovada Sülh Korpusunun könüllüsüdür, kiçik oğul isə ABŞ-da məktəbdə oxuyur. O, Vaşinqton Universitetində (Sietl şəhəri) doktor dərəcəsinə yiyələnib, habelə biznes idarəçiliyi və beynəlxalq diplomatiya üzrə magistr dərəcəsinə malikdir.

1991-ci ildə USAID Dağlıq Qarabağ münaqişəsi nəticəsində zərər çəkmiş 800,000-dən artıq qaçqın və məcburi köçkünə humanitar yardım göstərməklə Azərbaycanda yardım proqramlarına başlayıb. Həmin proqramlar vasitəsilə qida, geyim, sığınacaq, tibbi xidmətlər və iş bacarıqları üzrə təlimlər təmin olunub. 1998-ci ildə USAID humanitar yardım proqramlarından daha geniş iqtisadi, sosial və demokratik inkişaf proqramlarına keçid etdi. USAID su və sanitariya, vətəndaş cəmiyyəti, idarəetmə, kənd təsərrüfatı, biznes mühitinin yaxşılaşdırılması və Ümumdünya Ticarət Təşkilatına qəbul, habelə vərəmə nəzarət, ana, neonatal və uşaq sağlamlığı və ana və uşaqların qıdalanması sahələrində proqramlara dəstək vermişdi.

Bu gün, USAID Azərbaycan iqtisadiyyatının qeyri-neft sektorunun inkişafını və regional bazarlara inteqrasiyasını, habelə ABŞ və Azərbaycan arasında iqtisadi imkanların yaradılmasını dəstəkləyən proqramlar vasitəsilə Azərbaycan xalqına dəstəyini davam etdirir. Həmçinin USAID yerli sosial-iqtisadi məsələlərin həllində vətəndaşların imkanlarını artırır, habelə yerli icmaların bacarıqlarını artırmaqla və vətəndaş cəmiyyətinə dəstək göstərməklə yaşam mühitini yaxşılaşdırır.Bundan başqa, USAID iş tapmaq, biznes qurmaq və lider vəzifələrdə xidmət etmək üçün qadın və gənclərə lazım olan bacarıqları verməklə və dəstəyi göstərməklə Azərbaycanda işçi qüvvəsinin formalaşdırılmasına yardımçı olur. -0-