Media-icmal 16.07.18

Gəncə hadisələri fonunda ölkədə multikultural vəziyyətə nəzər, Nardaran hadisələrində şikəst olan şəxsin həbsxana şəraitində saxlanmasına baxış, yerli meyvə növlərinin sıradan çıxa bilməsi ehtimalı bugünki (16 iyul, 2018-ci il) medianın aparıcı mövzularındandır...

Ölkədaxili sabitliyin qarantı

"Xalq qəzeti"ndə dərc olunan "Azərbaycanın multikulturalizm siyasəti ölkədaxili sabitliyin qarantıdır" sərlövhəli məqalədə Prezident Administrasiyasının millətlərarası münasibətlər, multikulturalizm və dini məsələlər şöbəsinin müdiri Etibar Nəcəfov ölkədə multikurtual və dini durumu dəyərləndirir.

Müəllif bu münasibətlərin səviyyəsini iyulun 3-də və 10-da Gəncədə baş vermiş hadisələr fonunda şərh edir.

Şöbə müdiri Gəncədə baş vermiş hadisələri ekstremist qüvvələrin din amilindən sui-istifadə etməsi adlandırır, amma bu qüvvələrin dindarların dəstəyini qazana bilmədiyini deyir.

Müəllif dindarların bu addımı dəstəkləməmələrinin səbəbini izah edərək bildirir: "Çünki dövlət-din münasibətləri möhkəm təməllər üzərində qurulan ölkəmizdə dindarlara daim dövlət tərəfindən diqqət və qayğı göstərilir. Buna Gəncə şəhərində yaşayan dindarlar da şahiddir".

Administrasiya məsulu bu münasibətlərin möhkəmliyinə nümunə kimi dövlət başçısı İlham Əliyevin və birinci vitse-prezident Mehriban Əliyevanın göstərişi və qayğısı ilə Gəncədəki İmamzadə Ziyarətgah Kompleksinin yenidən qurulmasını, Şah Abbas cümə və Həzrət Zeynəb məscidlərinin təmir və bərpasını göstərir.

Şöbə müdiri bildirir ki, hazırda Gəncə şəhərində altı məscid və bir ziyarətgah kompleksi fəaliyyət göstərir, bu ibadət yerlərinə QMİ tərəfindən din xadimləri təyin edilib və onlara Dini Qurumlarla İş üzrə Dövlət Komitəsinin nəzdində fəaliyyət göstərən Mənəvi Dəyərlərin Təbliği Fondu vasitəsilə maddi dəstək verilir.

E.Nəcəfov hesab edir ki, burada problem xaricdən idarə edilən azsaylı dindar qrupun bəzi din xadimlərini qəbul etməməsində, məscidlərə gəlməmələrində və mötədil dindarlarla eyni səfdə ibadət etmək istəməmələrindədir. "Həmin qrupun mənsubları şəhərdə müxtəlif vaxtlarda təxribatlar törədərək, ictimai-siyasi sabitliyi pozmağa çalışırlar. Araşdırmalar göstərir ki, xarici qüvvələrin və onların yerlərdəki əlaltılarının məqsədi Azərbaycanda dünyəvi sistemi dəyişərək, şəriət prinsipləri ilə idarə olunan dövlət qurmaqdır".

E.Nəcəfov bildirir ki, iğtişaşlar törətmək, cəmiyyəti xaos və hərc-mərcliyə sürükləmək, dövlət orqanlarının nümayəndələrinə qarşı zorakılıq tətbiq etmək onların əsas mübarizə metodlarındandır.

Şöbə müdiri həmin "radikal"ların Gəncədə 2011-2012-ci illərdə qanunsuz küçə yürüşləri təşkil etmək yolu ilə ictimai asayişi pozmalarını, 2015-ci ildə Aşura mərasimi zamanı hüquq-mühafizə orqanlarına hücum çəkmələri və analoji hadisənin ötən il Tasua axşamı İmamzadə ziyarətgahında təkrarlanmasını göstərir.

Müəllifə görə, bu radikal qrupun fəaliyyəti 2015-cı ilin noyabrında Nardaranda terror hadisəsi törədən qeyri-qanuni "Müsəlman Birliyi" Hərəkatının fonunda dəyərləndirilməlidir.

E.Nəcəfov Gəncə hadisələrinin iştirakçılarına xaricdən dəstək verildiyini də bildirir.

Onlar da cinayətkardır?

"Azadlıq.info"da isə "Zülm etmək insanı böyük etməz..." sərlövhəli məqalə oxumaq olar.

Müəllif 2015-ci ilin 26 noyabr "Nardaran hadisələri" zamanı güllə yarası alaraq ömürlük şikəst qalan və buna baxmayaraq, Qobustan qapalı həbsxanasına

göndərilən Nardaran sakini Əbülfəz Bünyatovun taleyini gündəmin müzakirəsinə gətirir: "İndi də şikəst etdiyi, cavan yaşında bütün həyatını, sağlamlığını məhv etdiyi xəstə bir adama savaş açıb. Söhbət Əbülfəz Bünyatovdan gedir. Onun bütün bədəni hərəkətsizdir. Bir əllərini tərpədə bilir. Təbii ehtiyaclarını belə kiminsə köməyi olmadan ödəyə bilməz. Bədəni büsbütün yataq yaralarıdır və belə bir adamı Qobustan həbsxanasına göndəriblər".

Müəllif Zümrüd Yağmur bunu insanı öldürmək hesab edərək, Ə. Bünyatovun o qapalı, isti və heç bir tibbi yardım, baxım üçün kimsənin olmadığı bir yerdə necə yaşayacağı, onu kimin yedirəcəyi, hər gün yataq yaralarını sarıyıb təmizləyəcəyi kimi sualları ortaya qoyur.

Müəllifə görə, bu sualların cavabını kimin verəcəyi də bəlli deyil.

Məqalə müəllifi bu durumdan çıxış yolu kimi hakimiyyətə Ə.Bünyatovun indiyə qədərki kimi ev dustağı olunmasını təklif edir: "Əbülfəz Bünyatov cinayətkar deyil, amma illah onu cinayətkar elan edib həbs edəcəksinizsə, ev dustağı edin. Necə ki, etmişdiniz. O, şikəstdir, hərəkət edə bilmir, kimsəylə əlaqəsi və nəsə etmək imkanı yoxdur. Bu hikkə nəyin nəsi? Bəlkə daha böyük, daha əzəmətli, bütün haqqlara sahib olduğunuzu sübut etmək istəyirsiniz? Zülmkar olmaq, daha çox zülm etmək insanı böyük etməz, olsa-olsa lənətlik edər".

Yazı müəllifi Ə.Bünyatov həbsxanaya göndərilsə də, onun ailə üzvlərinə olan məhduduiyyətlərin aradan qaldırılmadığını diqqətə çatdırır.

Müəllif vurğulayır ki, Ə.Bünyatovun ev telefonunu belə kəsiblər, evinin yanındakı postu götürməyiblər, ev sakinlərinin giriş-çıxışına maneələr qalır, ev telefonunun kabellərinin bərpası üçün usta çağırılmasına imkan verilmir.

"Evdə olan iki qadın və 3 uşaqdamı cinayətkardır?

Bəlkə onları da həbs edib bir dəfəlik Əbülfəz bəyin evini də kürüyüb dağıdasınız?
Böyüklük iddianız təmin edilmiş olar!", - deyə müəllif ailəyə olan münasibətə etirazını ifadə edir.

Biznesmenə demək olmaz ki,...

"Yeni Müsavat" qəzetində isə diqqəti "Yeni gətirilən meyvə sortları: üstünlüyü yerli məhsula verək, yoxsa..." sərlövhəli məqalə cəlb edir.

Müəllif deyir ki, Azərbaycanda meyvə-tərəvəzin istehsalı və ixracı sürətlə artır və son iki ildə bu məhsulların ölkədən kənara ixracında qeydə alınan böyük artım diqqəti cəlb edir.

Yazı müəllifi bu sahədə ixracın artımını göstərən bəzi rəsmi statistik göstəriciləri sadaladıqdan sonra deyir ki, sahibkarlar xarici ölkələrdən çoxsaylı meyvə-tərəvəz sortları gətirirlər.

Müəllif vurğulayır ki, bu sortlar yerli sortlardan məhsuldarlığı, eləcə də xəstəliklərə davamlılığı ilə seçilsə də, yerli əhali bir çox hallarda yeni gətirilən meyvə-tərəvəz sortlarının dadını bəyənmir.

Müəllifə görə, insanlar tez-tez köhnə sortların daha dadlı olduğunu bildirir, onların sıradan çıxacağından ehtiyatlanırlar.

Azərbaycan Meyvə-Tərəvəz İstehsalçıları və İxracatçıları Assosiasiyasının rəhbəri Bəşir Quliyev isə müəllifin bu mövqeyilə razılşamır: "Yeni gətirilənlər də mədəni sortlardır, meşə sortları deyil ki. Bu gün bizim ənənəvi adlandırdığımız sortlar 60-70-ci illərdə sovet elmi institutları, alimləri tərəfindən yetişdirilən sortlardır. Onları ilkin olaraq sovxoz-kolxozların bağlarında əkirdilər, sonralar həyətlərə də gedib çıxdı".

B.Quliyev deyir ki, Bakı pomidoru deyilən "Durento" 1972-ci ildə Hollandiyanın "Royal Fitch" şirkəti tərəfindən yaradılıb, 1990-cı illərdə Bakıya gətirilib. Belə götürdükdə, pomidor, ümumiyyətlə, Azərbaycanın yerli bitkisi deyil, Amerikadan gətirilmədir.

Assosiasiya rəhbərinə görə, meyvəni dadlı edən torpaq və təbii-iqlim şərtləridir: "Hər hansı sortu gətirib yetişdirsək, Azərbaycanın torpağı, təbii-iqlim şəraitinə uyğunlaşacaq, dadlı olacaq: "Digər tərəfdən, sahibkara, biznesmenə demək olmaz ki, yeni sortlar axtarma, gətirmə. Sahibkarların da gətirdiyi hər sort özünü tutmur axı. Hansı dadlı, məhsuldar olursa, o da özünə bazar tapır".

İş adamı M.Həsənli isə bildirir ki, bir neçə sort meyvəni istixana şəraitində yetişdirirlər: "Yerli məhsullardan 20-30 gün əvvəl yetişəcək meyvələr.

Üç cür ərik, şaftalı, yapon alçası və üzüm əkmişik. Bu il ilkin olaraq 500 kiloqramadək şaftalı və nektarin topladıq".

M.Həsənli deyir ki, bunlar yerli sortlardan da qat-qat ləzzətli meyvələrdir, gələn ilin aprelindən daha çox həcmdə məhsul bazara çıxarılacaq, amma buna görə köhnə sortların sıradan çıxacağından ehtiyatlanmağa ehtiyac yoxdur.