Vardanyan vəzifədən azad edilib /YENİLƏNİB/

Bakı/23.02.23/Turan: Qarabağ "prezidenti" Araik Arutyunyan bu gün "dövlət naziri" Ruben Vardanyanı vəzifədən azad edib. O, bu barədə "hökumətin" bugünki iclasında bildirib.

Ermənistan KİV-lərinin yaydığı məlumata görə, Arutyunyan hərbi-siyasi vəziyyət haqqında məlumat verib və onunla Vardanyan arasında heç bir ədavət olmadığını bildirib.

"Bütün bu müddət ərzində biz birlikdə idik, mövcud problemlərin həllini müzakirə edirdik. O, həmişə məsuliyyəti mənimlə bölüşməyə hazır idi", deyə Arutyunyan bildirib.

Daha sonra o, "baş prokuror" Gurgen Nersisyana Vardanyanın yerini tutmağı təklif etdiyini qeyd edib.

Arutyunyanın sözlərinə görə, yeni "dövlət nazirinin" koordinasiya sahəsinə güc və xarici işlər qurumları istisna olmaqla, bütün icra hakimiyyəti orqanları daxil olacaq.

Xatırladaq ki, rəsmi Bakı Vardanyanı "Moskvanın elçisi" adlandıraraq, onun Qarabağdan getməsini tələb edirdi.

Dünən Vardanyanın müşaviri bildirib ki, o, vəzifədən getsə, Qarabağı tərk etməyəcək. 02D

*   *   *

2023 Fevral 23 (Cümə axşamı) 12:01:17

Ruben Vardanyan bu gün vəzifədən azad ediləcək - KİV

Bakı/23.02.23/Turan: Bu gün Ermənistanın "Past" nəşri Ruben Vardanyanın "Arsax prezidentinin fərmanı ilə dövlət naziri" vəzifəsindən azad ediləcəyi haqqında məlumat yayıb.

Nəşrdə yer alan məlumata görə, dünən Araik Arutyunyan və "Arsaxın baş prokuroru" Gurgen Nersisyan Nikol Paşinyanla görüşüblər və Vardanyanın vəzifədən azad edilməsi və onun yerinə Nersisyanın təyin edilməsi üçün onun razılığını alıblar. 02D