Vəkil keçmiş komandanın həbsini əsassız sayır

Hazırda həbsdə saxlanılan Hərbi Dəniz Qüvvələrinin (HDQ) keçmiş komandanı Şahin Sultanovun vəkili Adəm Məmmədov və ailə üzvləri cümə günü Beynəlxalq Mətbuat Mərkəzində (BMM) mətbuat konfransı keçiriblər.

A.Məmmədov Ş.Sultanovun həbsini əsassız sayıb və bu həbsi “şərləmə”nin nəticəsi adlandırıb. O, keçmiş komandana qarşı kütləvi miqdarda mənimsəmə və vəzifə saxtakarlığı kimi ittihamları uydurma hesab edib.

O qeyd edib ki, Ş.Sultanova qarşı ittiham Elxan Hacıyev adlı şəxsin həbsindən üç ay sonra baş verib. Belə ki, həbsindən üç ay sonra E.Hacıyev vəkildən imtina edərək öz əleyhinə sərbəst ifadə verib. E.Hacıyev istintaqa Ş.Sultanovun xidməti kabinetində keçmiş komandana 8 min manat pul verməsi haqda ifadə verib. O deyib ki, külli miqdarda yeyinti məhz 7-8 min manatdan başladığı üçün E.Hacıyev məhz bu məbləği göstərib.

Amma üzləşmə zamanı E.Hacıyev bu məbləğin 8 min manat yox, 7 min manat olduğunu bildirib. Bu ifadəni ziddiyyətli sayan vəkil Ş.Sultanovun məhz bu ziddiyyətli ifadəyə əsasən saxlandığını diqqətə çatdırıb. Vəkil bu ifadəni ziddiyyətli və yalan sayaraq, bunun özünü keçmiş komandanın “günahsız” olmasının göstəricisi kimi şərh edib.

Vəkil A.Məmmədov E.Hacıyevdən başqa digər təqsirləndirilən şəxslərin Ş.Sultanov əleyhinə ifadə vermədiklərini vurğulayıb. “Bundan sonra təqsirləndirilən digər şəxslər də Ş.Sultanovun əleyhinə ifadə versələr, bu, istintaqın qərəzli, qeyri-obyektiv olması ilə bağlı şübhələri daha da dərinləşdirəcək”, - deyə vəkil xəbərdarlıq edib. 

Daha sonra vəkil Ş.Sultanovun ailəsi adından dövlət başçısı İlham Əliyevə və xanımı Mehriban Əliyevaya müraciət edərək, keçmiş komandan barədə həbs-qətimkan tədbirinin ev dustaqlığı ilə əvəz etməsinə yardımçı olmasını xahiş edib.

Tədbirdə çıxış edən hərbi ekspert Üzeyir Cəfərliyə görə, Ş.Sultanovun həbsi Baş Qərargah rəisi Nəcməddin Sadıqovun işidir. Onun sözlərinə görə, bu addımları ilə Baş Qərargah rəisi keçmiş müdafiə naziri Səfər Əbiyevin ətrafından intiqam alır.

Mətbuat konfransında Ş.Sultanovla bağlı digər məqamlara toxunulub. Belə ki, 2011-12-ci illərdə indiki “Bayraq Meydanı” ərazisində yenidənqurma ilə bağlı buradakı sakinlərin köçürülməsi, onlara kompensasiylar verilməsi, köçürülən sakinlərə qarşı zorakılıq və bunda Ş.Sultanovun rolu müzakirə edilib. Vəkil iddia edib ki, sakinlərə kompensasiya ödənilən zaman Ş.Sultanov xaricdə olub və bu məsələni HDQ Qərargahında yaradılan komissiya icra edib. Buradaki sakinlərin mülkiyyət hüquqlarını qoruyan hüquq müdafiəçisi Bəxtiyar Məmmədovun məhz Ş.Sultanovun şikayəti əsasında həbsə alınmasını vəkil inkar edib. Rəsmi ittihama əsaslanaraq, B.Məmmədovun həbsinə səbəb kimi Ş.Sultanovdan pul almaq istəməsini göstərib.

Xatırladaq ki, Ş.Sultanov bir neçə il ərzində HDQ-nin komandanı olub. 2014-cü ilin aprelin ortalarında vəzifəsindən azad edilib, 2014-cü il aprelin 21-də həbsə alınıb. Baki Hərbi Məhkəməsi barəsində 3 aylıq həbs-qətimkan tədbiri seçib. Keçmiş komandana külli kirqdada mənimsəmə və vəzifə saxtakarlığı ittihamları irəli sürülüb. -05C-