Vəkil: “Müalicə müəssisəsində Fazil Qasımova qarşı münasibət Ədliyyə Nazirliyinin təlimatına uyğun  deyil”

Fazil Qasımov həbs edilməsinə etiraz olaraq 51 gündür Penitensiar Xidmətin müalicə müəssisəsində aclıq edir. Bu barədə Turan-a iqtisadçının qardaşı  Nazim Qasımov  avqustun 3-də onunla görüşdən sonra bildirib.

“Biz Fazillə müalicə müəssisəsində görüşdük. Anam ağır xəstə olmasına baxmayaraq, o da  mənimlə gəldi. Anam və mənim Fazilə yalvarışlarımıza baxmayaraq, o, aclığı dayandırmayacağını dedi. Anam Fazilin belə ağır durumunu görəndən sonra halı çox pisləşdi. Hazırda həkim nəzarətindədir, halı çox ağırdır. Fazili çox ağır vəziyyətdə gördük. Ağrılardan büzüşüb. Böyük miqdrada çəki itirib. Böyrəklərində, mədəsində, ürəyindəki ağrılardan qıvrılır. Dedi ayaqlarında güc qalmayıb, qıc olur”, - Nazim Qasımov bildirib.

Onun sözlərinə görə, Ədliyyə Nazirliyinin göstərişlərinə əsasən, aclıq edən məhbusların  şəkər qəbul etməsinə icazə verilir.

“Bu səbəbdən ona 300 qram bal verməyimizə icazə verdilər. Amma Fazilin balı qida kimi qəbul edəcəyinə əmin deyilik”, - o qeyd edib.

Vəkil Rövşanə Rəhimli Turan-ın müxbirilə söhbətində deyib ki, Ədliyyə Nazirliyinin “Penitensiar müəssisələrdə yemək qəbul etməkdən imtina edən məhkumların, habelə həbs edilmiş şəxslərin saxlanma şəraiti və onların məcburi qaydada qidalandırılması haqqında təlimatı”nın “Yemək qəbul etməkdən imtina etmiş şəxslər barəsində görülən tibbi xarakterli tədbirlərə dair qaydalar” adlı üçüncü əlavəsində deyilir ki, məhkum tam formada qida qəbulundan imtina edirsə, adi və ya bəzən şəkərlə və ya balla kəmşirinləşdirilmiş su qəbul edə bilər.

Rəhimovanın sözlərinə görə, Fazil Qasımova qarşı münasibət “Cəzaçəkmə müəssisələrində, istintaq təcridxanalarında yemək qəbul etməkdən imtina edən məhkumların, həbsə alınmış şəxslərin saxlanma şəraiti və onların məcburi qaydada qidalandırılması haqqında təlimat”a uyğun deyil.

“Həkim nəzarəti olmasına baxmayaraq, Fazil Qasımovun çəkisi, arterial qan təzyiqi, nəbzi, qəbul etdiyi mayenin miqdarı və tezliyi, ümumi vəziyyəti və kliniki əlamətləri, səhhəti ilə bağlı şikayətləri, psixi vəziyyəti təlimata uyğun aparılmır. Onun sürətlə çəki itirməsinə baxmayaraq, hər gün çəkisi və təzyiqi ölçülmür. Belə gedərsə, gələn həftə müalicə müəssisəsində Fazil Qasımova qarşı yaxşı olmayan münasibətdən Ədliyyə Nazirliyinə şikayət edəcəm”, - vəkil deyib.

Penitensiar Xidmətdən şərh almaq mümkün olmayıb.

* Fazil Qasımov 7 avqust 2023-cü ildə Türkiyədə saxlanılıb və Azərbaycana gətirilib. O,  Cinayət Məcəlləsinin 204.3.1-ci (mütəşəkkil qrupun tərkibində saxta pulların hazırlanması, alınması və ya satışı) maddəsilə ittiham olunub.

İstintaq bildirir ki, o, saxta pulları sonradan həbs olunmuş müxalifətçi siyasətçi Qubad İbadoğluna verib.

Bu yaxınlarda Qasımov baş prokuror, ombudsman, yerli və beynəlxalq ictimaiyyətə müraciətində bildirib ki, bu ifadələri işgəncə altında verib. O,  ifadələrdən imtina edərək İbadoğluna saxta pul vermədiyini, onunla heç vaxt FETO (Türkiyədə terror təşkilatı kimi tanınan Fətullah Gülən hərəkatı) mövzularında müzakirələr aparmadığını bildirib.

Fazil Qasımov əsassız cinayət təqibinə və istintaqın əvvəlində məruz qaldığı işgəncələrə etiraz olaraq iyunun 14-dən aclıq edir.