Prokuror deputata sui-qəsddə ittiham olunan şəxslərə cəza müddəti istəyib

Avqustun 2-də Bakı Ağır Cinayətlər Məhkəməsində deputat Fazil Mustafaya hücum işi üzrə prosesdə dövlət ittihamçısı yekun sözlə çıxış edib. O, Azər Sarıcanovun ömürlük, digər üç müttəhim - Rəşad Əhmədov, Elşad Əsgərov və Səbuhi Şirinovun hər birinin 20 il, Emin Əliyarovun isə 5 il real həbs cəzasına məhkum olunmasını təklif edib.

Müttəhimlər Azərbaycan Cinayət Məcəlləsinin 277-ci (dövlət və ya ictimai xadimin həyatına qəsd) və 228.2.1-ci (bir qrup şəxs tərəfindən silah və döyüş sursatının qanunsuz dövriyyəsi) maddələri  üzrə öz günahlarını qismən etiraf edirlər.

Onlar məhkəmədə bildiriblər ki, deputata silahlı hücum onun dövlət və ya siyasi fəaliyyətilə əlaqədar olmayıb, "dini mövzuda fikirlərilə" əlaqəli olub.

Əsasən onlar  Mustafanın şiələrin Aşura günündə kişilərin matəm tutmasını qınaması  ilə razı deyil.

Müttəhimlər bildiriblər ki, Mustafanı öldürmək niyyətində olmayıblar, "cəzalandırmaq" istəyiblər.

Mustafaya atəş açan Səbuhi Şirinov deyib ki, Mustafanı öldürmək istəsəydi, hərbçi olarkən ölümcül  atəşlə bunu edərdi.

Vəkillər hesab edirlər ki, prokuror həddindən artıq sərt cəza istəyib.

Növbəti məhkəmə iclası avqustun 7-nə təyin edilib.

2023-cü il martın 28-də axşam Bakıda naməlum şəxs Fazil Mustafaya bir neçə dəfə atəş açıb. Deputat yaralanıb və xəstəxanaya aparılıb, həkimlər həyatına təhlükənin olmadığını bildiriblər.

İş Azərbaycan Cinayət Məcəlləsinin 277-ci (dövlət və ya ictimai xadimin həyatına cəhd) və 228.2.1-ci (bir qrup şəxs tərəfindən silah və sursatın qanunsuz dövriyyəsi) maddələri üzrə  araşdırılıb.

İstintaqın versiyasına görə, deputata sui-qəsd İran xüsusi xidmət orqanlarının tapşırığı ilə təşkil edilib.