Vəkil: “Nazim Bəydəmirli aclıq elan edib”

Bakı/06.09.23/Turan: İstintaq Təcridxanasında saxlanılan keçmiş deputat, sahibkar Nazim Bəydəmirli əsassız həbsinə etiraz olaraq aclıq elan edib. Bu barədə Turan-a vəkil Aqil Layıc bildirib.

O qeyd edib ki, sonuncu dəfə Bəydəmirliylə keçən həftə görüşüb və o deyib ki,  saxta ittihamlarla əsassız həbs olunmasına etiraz olaraq sentyabrın 4-dən aclıq elan edəcək.

"Mənə məlumat gəldi ki, o, artıq aclığa başlayıb. Bu məlumatı yalnız sabah onunla görüş zamanı yoxlaya bilərəm", - vəkil deyib.

Keçmiş deputatın ailəsi onun aclıq etməsindən narahatdır.

"Qrafik üzrə sabah Nazim Bəydəmirlinin ailəsilə telefon danışığı olmalıdır. Biz onun aclıq etməsindən çox narahatıq”, - sahibkarın xanımı Fəridə Bəydəmirli deyib.

Penitensiar Xidmətdən Turan-ın sorğusuna cavab olaraq bildiriblər ki, Bəydəmirlidən aclıq barədə müraciət daxil olmayıb.

*Nazim Bəydəmirli iyulun 4-də Daxili İşlər Nazirliyi Mütəşəkkil Cinayətkarlıqla Mübarizə Baş İdarəsi tərəfindən saxlanılıb. Ona qarşı Azərbaycan Cinayət Məcəlləsinin 182.2.4-cü maddəsilə (xeyli miqdarda əmlaka sahib olmaq məqsədilə hədə-qorxu ilə tələb etmək) ittiham irəli sürülüb.

Ertəsi gün məhkəmə onun barəsində 4 ay müddətinə həbs qətimkan tədbiri seçib. Bəydəmirli ittihamı rədd edərək onu uydurma və hüquqi əsaslardan məhrum adlandırıb. Onun sözlərinə görə, həbsinin əsl səbəbi Gədəbəy rayonunun Söyüdlü kəndi yaxınlığındakı qızıl  emalı zavodunun ətraf mühiti çirkləndirməsilə bağlı sakinlərin etirazları ilə əlaqədar çıxışlarıdır.

Sentyabrın 1-də Bəydəmirliyə  qarşı Cinayət Məcəlləsinin 182.2.2-ci maddəsilə (hədə-qorxu ilə təkrar tələb etmə) daha bir ittiham irəli sürülüb.

Vəkilin sözlərinə görə, bu ittiham 1996-cı ildə Rusiya Federasiyasının Lipetsk şəhərində guya Bəydəmirlinin təhdid yoluyla kimdənsə pul tələb etməsinə əsaslanır. Vəkil həm mahiyyət etibarilə, həm də iddia müddətinin keçməsilə əlaqədar ittihamın əsassız olduğunu deyib.

Hüquq müdafiəçiləri Nazim Bəydəmirlini siyasi məhbus kimi tanıyıblar. 03B06