Məhkəmə Voskanyanı 18 il azadlıqdan məhrum edib

Bakı/07.12.23/Turan:  Günün ikinci yarısında Voskanyanın işi üzrə prosesdə tərəflərin mübahisələri başa çatıb.

Hakim məhkəmə istintaqının başa çatdığını elan edib, bundan sonra dövlət ittihamçısı son söz ilə çıxış edib.

O bildirib ki, Voskanyanın günahı məhkəmə istintaqı ilə sübut olunub. Prokuror onun 18 il azadlıqdan məhrum edilməsini istəyib.

Hakimlərin məşvərətindən sonra hökm oxunub. Məhkəmə Voskanyanı ilk 5 ili qapalı həbsxanada keçirməklə 18 il müddətinə azadlıqdan məhrum edib.

Voskanyan cəzasını çəkdikdən sonra Azərbaycandan deportasiya ediləcək. – 06B-

* * *

Voskanyanı ömürlük həbs cəzası gözləyir

Bakı/07.12.23/Turan: Cümə axşamı Sabunçu Rayon Məhkəməsində Kəlbəcər rayonunda saxlanılan erməni hərbçi Qaqik Voskanyanın işi üzrə istintaq başlanıb.

İşə Gəncə Ağır Cinayətlər Məhkəməsinin hakimi Abdulla Məmmədovun sədrliyilə hakim heyəti baxır.

İclas zamanı dövlət ittihamçısı Müşfiq Rəhimov ittiham aktını oxuyub. Voskanyana irəli sürülən maddələrdən biri (terrorizm) üzrə onu ömürlük həbs, digər maddələr üzrə  20 ilə qədər həbs cəzası gözləyir.

Voskanyan özünü günahkar saymayıb.

O bu il avqustun 16-da sərhədin Kəlbəcər istiqamətində saxlanılıb. Azərbaycan Müdafiə Nazirliyinin məlumatına görə, diversiya-kəşfiyyat qrupunun üzvü olub.

Ona qarşı Azərbaycan Cinayət Məcəlləsinin 206.3.2 (qaçaqmalçılıq), 214.2.1 (terrorizm) və 318.2 (sərhədi qanunsuz keçmək) maddələrilə ittihamlar irəli sürülüb. – 06B-