Xarici diplomatlar işğaldan azad edilmiş Şuşa ilə tanış olurlar

Bakı/09.07.21/Turan: Bu gün 100-dən çox xarici diplomat – xarici dövlətlərin Azərbaycandakı səfirliklərinin və beynəlxalq təşkilatların ölkədəki missiyalarının nümayəndələri 2020-ci ilin noyabrında erməni işğalından azad edilmiş Şuşa şəhərinə səfər edir.

Onlar arasında Türkiyə, Pakistan, İtaliya, Avstriya, İsveç, Polşa, İsrail, Çin, Yaponiya, Malayziya, Cənubi Koreya, Belarus, Ukrayna, Braziliya, Meksika, Səudiyyə Ərəbistanı, Qatar, Əlcəzair səfirləri və digər ölkələrin diplomatları var.

Səfər xarici diplomatların Şuşada həyata keçirilən bərpa və yenidənqurma işləri, şəhərin özünəxas memarlıq üslubu, Azərbaycan xalqının milli-mədəni irsi ilə tanış olması məqsədilə təşkil edilib.

Diplomatlar Füzuli beynəlxalq hava limanının tikintisi ilə tanış olacaq, daha sonra yeni “Zəfər” yolu ilə Şuşaya gedəcəklər.

Diplomatların Füzuli və Şuşaya səfəri iyunun 10-na qədər davam edəcək. -06D-