Yeni orden və medalların təsis edilməsi haqqında qanun layihəsi ikinci oxunuşda qəbul edilib

Bakı/24.11.20/Turan:  Noyabrın 24-də Azərbaycan parlamenti "Azərbaycanın orden və medallarının təsis edilməsi haqqında" qanuna düzəlişlər layihəsini ikinci oxunuşda qəbul edib. Qanun layihəsinə əsasən, 20-yə yaxın yeni orden və medalın təsis edilməsi nəzərdə tutulur.

Onların arasında "Zəfər"  və "Qarabağ" ordenləri və “Vətən Müharibəsi Qəhrəmanı” adı var. Medallar: “Cəsur döyüşçü” medalı, “Döyüşdə fərqlənməyə görə” medalı, “Suqovuşanın azad olunmasına görə” medalı, “Cəbrayılın azad olunmasına görə” medalı, “Xocavəndin azad olunmasına görə” medalı, Füzulinin azad olunmasına görə” medalı, “Zəngilanın azad olunmasına görə” medalı, “Qubadlının azad olunmasına görə” medalı, “Şuşanın azad olunmasına görə” medalı, “Kəlbəcərin azad olunmasına görə” medalı, “Ağdamın azad olunmasına görə” medalı, “Laçının azad olunmasına görə” medalı, “Vətən müharibəsi iştirakçısı” medalı, “Vətən müharibəsində arxa cəbhədə xidmətlərə görə” medalı”.

"Zəfər" ordeni 900 əyarlı qızıldan hazırlanaraq strateji əhəmiyyətli ərazilərin, yaşayış məntəqələrinin, rayonların və ya şəhərlərin azad edilməsinə görə Azərbaycan Silahlı Qüvvələri hissə komandirlərinə və ali rəhbər təqdim veriləcək.

"Qarabağ" ordeni də qızıldan olacaq. Onunla düşmənin canlı qüvvəsinin və texnikasının məhv edilməsində şücaət göstərmiş şəxslər təltif olunacaq.

"Vətən Müharibəsi Qəhrəmanı" adı düşmən qoşunlarının darmadağın edilməsində döyüş xidmətlərinə, həmçinin hərbi əməliyyatların idarə edilməsində yüksək peşəkarlığa və ya Azərbaycanın dövlət sərhədlərinin bərpa olunmasında şəxsi qəhrəmanlığa görə təqdim ediləcək.

Bundan əlavə, deputatlar ikinci oxunuşda İnzibati Xətalar Məcəlləsinə düzəlişlər layihəsini və "Ətraf mühitin mühafizəsi haqqında" qanunu qəbul ediblər.

Deputatlar "Azərbaycan Dövlət Neft və Sənaye Universitetinin 100 illiyi" medalının təsis edilməsi haqqında qərar layihəsini də ikinci oxunuşda təqdir ediblər.—06D-