Zeynallı: "Əgər məndə bu video olsaydı heç kimin göz yaşlarına baxmadan onu dərc etdirərdim"

"Yeni Musavat" qəzetinin 03.11.2012 tarixli sayında blogger Elnur Məcidli sabiq deputat Gülər Əhmədova ilə bağlı məlumatlar verərkən bildirib ki, G.Əhmədova ilə bağlı məlum video ictimaiyyətə açıqlanmamışdan əvvəl bir sıra qurumlara da göndərilib.

Bloggerin iddiasına görə, “Xural” qəzetinin baş redaktoru Əvəz Zeynallının həbsi ilə bu video arasında bir bağlılıq olub: “Çünki həmin video Əvəz Zeynallının da əlində olub. Gülər Əhmədova da bunu bildiyi üçün onu həbs etdirib”. 

Məsələyə hazırda həbsdə olan "Xural" qəzetinin baş redaktoru Əvəz Zeynallı münasibət bildirib. Baş redaktor bloggerin iddialarını əsassız sayıb: "Mən də ehtimal edirəm ki, həbs olunmağımda, hətta redaksiyada, yaşadığım evdə, o cümlədən maşınımda aparılan qanunsuz axtarışlar zamanı həmin video-disk axtarılıb. Çünki axtarışa gələnlərin müəmmalı suallarından biri də Gülərlə bağlı kasset və disk yazılarının olub-olmaması olub. Mən bunu dəfələrlə demişəm və yazmışam. Əgər məndə bu video olsaydı heç kimin göz yaşlarına baxmadan onu dərc etdirərdim. Çünki burada söhbət ciddi korrupsiya faktından gedir. Belə bir cinayəti təsdiq edən videofaktın yayılmasının  qarşısı heç bir şərt, güzəşt qarşılığında alına bilməzdi. 

Çox təəssüf edirəm ki, Elnur Məcidlinin iddia etdiyi kimi həmin video məndə olmayıb. Həbs olunan zaman da mən söhbətin konkret nə haqda getdiyini bilməsəm də, dəfələrlə mətbuata verdiyim açıqlamalarda qeyd etmişəm ki, məndə, ümumiyyətlə redaksiyada Gülərin əleyhinə olan hər hansı kompromat materiallar olmayıb. Və mən də iddia olunduğu kimi o materiallardan istifadə edərək, Gülərə qarşı hər hansı təhdidedici hərəkət etməmişəm. 

Bir daha təkrar edirəm. Məndə bu video olmayıb.  Olsaydı, yayımlanmasına mane olmazdım. Mən mətbuat adamıyam. Bunu etməklə öz peşəmlə məşğul olmuş olardım. Artıq indi məlum olur ki, Gülər Əhmədova həmin kasetin dövriyyədə olduğunu bilib. Xarakterimdəki bu xüsusiyyəti bildiyi üçün də  onu yayınlayacaq yeganə müstəqil mətbu orqan kimi bizdən ehtiyatlanıb və mənim həbs olunmağımda o səbəbdən onun da marağı olub. Ancaq hesab edirəm ki, mənim həbsim heç də təkcə bu vedeofaktla əlaqədar deyil." –0-