Avropa İttifaqı azad olunmuş ərazilərdə həyata keçirilən layihələrdə və nəqliyyat əlaqələrinin inkişafında iştirak edə bilər – Toyvo Klaar

Bakı/11.03.21/Turan: Avropa İttifaqının Azərbaycanla, ölkə hökuməti ilə geniş əlaqələri var və müharibədən sonra ortaya çıxan “spesifik” məsələlərin və problemlərin həlli üçün əməkdaşlığı davam etdirməyə hazırdır. Bu barədə Avropa İttifaqının Cənubi Qafqaz və Gürcüstanda böhran üzrə xüsusi nümayəndəsi Toyvo Klaar Turan agentliyinə eksklüziv müsahibəsində “Avropa İttifaqının Azərbaycanın azad olunmuş ərazilərində iqtisadi layihələri dəstəkləmək niyyəti varmı?” sualına cavabda bildirib.

“Bu məsələlər müzakirə mərhələsindədir, bəzi məsələlər üzrə Azərbaycan hakimiyyətindən cavab gözləyirik”, deyə diplomat qeyd edib.

Hər hansı konkret addımları nə vaxt gözləmək olar? Bu suala cavabda Klaar deyib ki, Avropa İttifaqı beynəlxalq təşkilatlara azad olunmuş ərazilərdə humanitar proqramlar üçün 6.9 milyon avro ayırmaqla, artıq iştirak edib. Xüsusən, bu vəsait münaqişə zonasında zərərçəkmiş şəxslərə dəstək üçün Qırmızı Xaç Komitəsinə verilib.

Bundan sonrakı əməkdaşlığa gəlincə, Avropa İttifaqının rəhbərliyi və Azərbaycan Xarici İşlər Nazirliyi yaxın aylarda digər sahələr üçün əlavə vəsait ayrılması haqqında danışıqlar aparır. “Biz buna hazırıq, amma Azərbaycan hakimiyyəti ilə razılıq əldə edilməlidir”, deyə Klaar qeyd edib.

Bakı tərəfindən Avropa İttifaqına hansısa xüsusi təkliflər daxil olub? Bu suala cavabda Klaar bildirib ki, artıq bir neçə ildir Avropa İttifaqı Dünya Bankı ilə birlikdə müharibəsonrası dövrdə ehtiyacların həllini nəzərdə tutan “Piis bilding assesment” (Sülhün bərpasının qiymətləndirilməsi) proqramını həyata keçirir.

“Bizə bu barədə xahiş daxil olub, onun üzərində işləyirik və bütün bunların necə həyata keçiriləcəyi barədə müzakirələr üçün qayıdacağıq”, deyə Klaar bildirib.

Avropa İttifaqının regional nəqliyyat layihələrinin həyata keçirilməsində, o cümlədən Azərbaycan və Naxçıvan arasında dəmir yolunun tikintisində iştirakı mümkündürmü? – sualına cavabda Klaar qeyd edib ki, prezident İlham Əliyevlə görüşdə bu mövzuya toxunulub.

“Avropa İttifaqı regionun inteqrasiyası üzrə layihələri dəstəkləməkdə çox maraqlıdır. Bizim üçün bu proseslərdə necə iştirak edə biləcəyimizi və ya necə faydalı ola biləcəyimizi anlamaq vacibdir. Xüsusən, bu, Ermənistan və Azərbaycan arasında su təchizatı üzrə transsərhəd layihələr ola bilər. Biz həmçinin nəqliyyat layihələrini dəstəkləməkdə və onlarda iştirakda maraqlıyıq və bunu Azərbaycanın baş nazir müavini və xarici işlər naziri ilə müzakirə edəcəyik”, deyə Klaar bildirib.

O əlavə edib ki, bu məsələlər üç tərəf – Azərbaycan, Ermənistan və Rusiya arasında müzakirə olunur. Avropa İttifaqı orada iştirak etmir, buna görə böyük məlumata malik olmaq və Brüsselin nə ilə kömək edə biləcəyini anlamaq lazımdır, deyə diplomat bildirib.

Ermənistan tərəfdən Azərbaycandan Naxçıvana dəmir yolunun bərpasının Ermənistana sərf etmədiyi barədə bəyanatlar səslənir. Avropa İttifaqının bununla bağlı fikri necədir? Bu suala cavab verən diplomat deyib ki, yeni nəqliyyat yolları və əlaqələr yaxşıdır. Onlar hər bir ölkənin suverenliyinə hörmət edilməklə yaradılmalıdır. İstənilən halda, bu, müsbət addımdır, çünki yollar açılır, insanlar sərbəst şəkildə hərəkət edir, iqtisadiyyat inkişaf edir. “Bu, həmçinin qarşılıqlı anlaşmanın yaxşılaşmasına, insanlar arasında əlaqələrin inkişafına şərait yaradır”, deyə Klaar qeyd edib. -02B-