Ekspert: �Erkən nikah seksual zorakılığı ehtiva edir�

Bakı/06.08.19/Turan: Oturuşmuş stereotipləri olan ölkələrdə erkən nikah problemi çoxlu çətinlik yaradır. Bunu "Təmiz Dünya" Qadınlara Yardım İctimai Birliyinin rəhbəri Mehriban Zeynalova "Amerikanın səsi"nə müsahibəsində ölkədə erkən nikahla bağlı vəziyyəti şərh edərkən deyib. Qanunvericilikdə erkən nikaha məcbur etməyə görə məsuliyyət nəzərdə tutulub. Eyni zamanda belə nikah məcburi nikaha bərabərdir. Dövlət orqanlarının həyata keçirdiyi tədbirlərə baxmayaraq, proplem hələ də aradan qaldırılmayıb.

"Problemin həllinə stereotiplər, adətlər mane olur ki, bunlar da xüsusilə kənd yerlərində daha geniş yayılıb. Cəmiyyət də erkən nikahlara qarşı passiv mübarizə aparır", - M.Zeynalova bildirib. O qeyd edib ki, sovet dövründə erkən nikah problemi demək olar ki, aradan qaldırılmışdı.

Stereotiplərə gəlincə, belə fikir var ki, qızlar oxumamalı, inkişaf etməməlidir və nə qədər tez ərə getsələr, bir o qədər yaxşıdır. Bundan əlavə, bəzən adət və ənənələr qanunları üstələyir.

Çoxları ehtiyat edirlər ki, qızlar ailə üçün yükə çevrilə bilər, hətta onu rüsvay edə bilər. Buradan da qız uşaqlarının doğulmasının qarşısının alınması üçün selektiv abort problemi yaranır.

Erkən nikah həm də ona təhlükəlidir ki, seksual zorakılığı ehtiva edir. "18 yaşına çatmayan şəxs həddi-büluğa çatmayan hesab olunur. Odur ki, onun nikaha daxil olmasına seksual zorakılığın tətbiqi kimi baxılmalıdır", - M.Zeynalova hesab edir.

Lakin cinayət işi qaldırmaq çətindir, çünki çox zaman bu cinayətin iştirakçıları erkən nikaha razılıq vermiş valideynlər də olur.

Erkən nikaha qarşı mübarizə kompleks şəkildə aparılmalıdır. Söhbət yalnız qurbanlar üçün sığınacaqların yaradılmasından getmir, həm də hüquqi, psixoloji yardım mərkəzi yaradılmalıdır. Həmçinin məişət zorakılığı qurbanları üçün pulsuz xidmət paketi olmalıdır. Müvafiq dövlət orqanları ayrı-ayrılıqda yox, qarşılıqlı əməkdaşlıq şəraitində fəaliyyət göstərməlidir. Bu istiqamətdə işi koordinasiya edən vahid komissiyanın yaradılması vacibdir, Mehriban Zeynalova hesab edir.-16D-