Əli İnsanov hakimiyyətin səmimiyyətinə inanmır

Bakı/02.03.21/Turan: Ölkənin 60 rayon və şəhərində Haqq və Ədalət Partiyasının bölmələri yaradılıb və strukturların formalaşdırılması prosesi davam edir. Bu barədə partiyanın lideri, keçmiş səhiyyə naziri Əli İnsanov "Amerikanın Səsi" radiosuna müsahibəsində bildirib. Partiya sənədləri Ədliyyə Nazirliyinə təkrar təqdim edib.

Ə.İnsanov müxalifət ilə dialoqa hazır olduğunu bəyan edən hakimiyyətin səmimiliyinə şübhə etdiyini bildirib.

“Dialoqa dəvət olunanların mövqeyi məlumdur. Ancaq müxalifət partiyaları ancaq iqtidarın ünsiyyətdə olduğu insanlardan ibarət deyil. Biz də həmçinin danışıqların əleyhinə deyilik və hakimiyyət bütün partiyaları dəvət etməli, gündəliyi açıq-aydın bildirməli, hansı məsələləri müzakirə etmək istədiklərini elan etməlidir.

Hazırkı danışıqlar isə etimad doğurmur, çünki bağlı qapılar arxasında aparılır. Orada nə deyirlər, nə barədə razılığa gəlirlər, hansı problemlər irəli sürülür – bütün bunlar qaranlıq qalır ", - Ə.İnsanov qeyd edib.

O,  hakimiyyətin Qarabağla bağlı siyasətini tənqid edərək 10 noyabr 2020-ci il tarixli sazişi (Azərbaycan, Ermənistan və Rusiya liderlərinin birgə bəyanatı) ölkə tarixində "qara ləkə" adlandıraraq onu Bakı üçün "təslimçilik" hesab edib.

“Faktiki olaraq ordumuzun qalib gəldiyi, torpaqları azad etdiyi və bunu başa çatdırdığı bir anda, gözlənilmədən bütün hər şey ruslara təslim olundu. Ruslar sülhməramlı qüvvələr adı ilə Qarabağı zəbt etdilər. Bu gün də işğalçı ordu Qarabağda öz bildiyi kimi fəaliyyət göstərir”, - Ə.İnsanov deyib.

“Bu, bizi qətiyyən qane edə bilməz. Hökumətin bundan sonrakı əsas siyasəti, birinci, rus ordusunun təcili Azərbaycandan çıxarılması üzərində işləməsidir. Bu barədə geniş işlər getməlidir. İkincisi, Türkiyənin vasitəçiliyilə Ermənistanın bugünkü hakimiyyətilə təcili danışıqlara başlamaq lazımdır. Yəni, münaqişəni sona çatdırmaq üçün danışıqlar ikitərəfli qaydada Ermənistan və Azərbaycan arasında aparılmalıdır. Burada ən yaxşı vasitəçi Türkiyə, Avropa İttifaqı, ABŞ ola bilər. Burada Rusiyanın iştirakı bizi qane edə bilməz. Çünki Rusiyanın məqsədi Dağlıq Qarabağı işğal etməklə Cənubi Qafqazda möhkəmlənməkdir”, - Ə.İnsanov bildirib.

O, öz sözlərini belə əsaslandırıb ki, Rusiya qoşunları Qarabağda erməni hərbçilər üçün təlimlər keçirir, Ermənistandan gələn hərbçiləri Laçın dəhlizindən buraxır, regionda separatçılıq əhval-ruhiyyəsinin güclənməsinə kömək edir.

Qarabağın erməni əhalisinə gəlincə, Azərbaycan erməniləri inandırmalıdır ki, onlar Azərbaycan vətəndaşlığını qəbul edərək Qarabağda sakit və rahat yaşaya bilərlər.

"Əgər Yerevan hökumətini bizim təkliflərimizi qəbul etməyə razı salmasaq, Rusiya həmişə Qarabağ ermənilərindən bizə qarşı istifadə edəcək", - Ə. İnsanov vurğulayıb.

*Əli İnsanov 2005-ci ildə dövlət çevrilişinə cəhddə ittiham olunaraq həbs edilib, lakin sonradan ittiham iqtisadi cinayətlərlə əvəz olunub. Məhkəmə onu 9 il müddətinə azadlıqdan məhrum edib.

Həbsdə olan Ə.İnsanov narkotik maddələrin yayılmasında ittiham olunub. Avropa İnsan Hüquqları Məhkəməsi onun həbsini əsassız hesab edib. 2019-cu ildə əfv edilib və azadlığa çıxıb. Hakimiyyətin əsas tənqidçilərindən biri olaraq qalır.—03B06-