Hakimiyyət auditoruyanın etimadını qaytarmaq yollarını axtarmalıdır

Bakı/10.04.20/Turan: Turan İnformasiya Agentliyinin direktoru Mehman Əliyev Bakı Mətbuat Klubunun layihəsi olan  “Mətbuat klubu” (Press-klub) proqramına müsahibəsində KİV-ə Dövlət Dəstəyi Fondunun icraçı direktoru Vüqar Səfərlinin və Milli Televiziya və Radio Şurasının sədri Nuşirəvan Məhərrəmlinin vəzifədən çıxarılmasını müsbət qiymətləndirib. Belə ki, onların çoxillik fəaliyyəti KİV-in tənəzzülü və auditoriya itkisi ilə xarakterizə olunub.

Lakin M.Əliyev qeyd edib ki, bu dövlət strukturlarının yeni təyin olunmuş rəhbərləri KİV-in aktual məsələlərinə dair öz çıxışları və fikirləri ilə heç vaxt fərqlənməyiblər və bu mənada aydın olur ki, Prezident Administrasiyasının ictimai-siyasi məsələlər şöbəsinin keçmiş müdiri Əli Həsənovun əlaltıları olmuş V.Səfərli və N.Məhərrəmlini çıxarmaq yuxarı instansiyalar üçün vacib idi.

İndiki halda hər şey KİV-ə qarşı münasibətdə hakimiyyətin seçəcəyi siyasi kursdan asılı olacaq.

Onun sözlərinə görə, bu gün hakimiyyət kardinal dəyişikliklərə, yəni KİV-ə azadlıq verməyə hazır deyil, çünki onlara nəzarət edə bilməyəcəyindən ehtiyatlanır və belə KİV onlar üçün alternativ olacaq.

M.Əliyev hesab edir ki, media siyasətini müəyyən edən dövlət strukturlarında, həm də nəzarətdə olan bəzi televiziyalarda son kadr dəyişiklikləri göstərir ki,  hakimiyyət auditoriya ilə əlaqəni itirməkdən narahatdır və etimadı qaytarmağa çalışır.

KİV və  hakimiyyətin münasibətlərinin sağlamlaşdırılması prosesi hakimiyyətin nəzarət etmək istəyini və cəmiyyətin azad mətbuata malik olmaq arzusunu ləngidir.

Bu gün iki paralel informasiya məkanı mövcuddur - TV, radio, media saytları, çap mediası timsalında KİV və sosial şəbəkələr. Sərbəst informasiya axını şəraitində məhz sonuncu ölkədəki vəziyyətin dərk edilməsinin əsas mənbəyinə çevrildi. Bu, ona görə baş verir ki, auditoriyanın gerçək informasiyaya ehtiyacı var, senzuraya məruz qalmışa yox.

Hakimiyyət auditoriyanın etimadını təkrar qazanmaq üçün bunu nəzərə almalıdır və onun başqa yolu yoxdur. KİV-in gələcəyi üçün nikbin amil məhz budur. —0—