Hakimiyyət "qaydasız döyüş" üsullarından istifadə edir - Əli Kərimli

Bakı/14.04.20/Turan: Aprelin 13-də saat 22:30 radələrində Xalq Cəbhəsi Partiyasının lideri Əli Kərimlinin mənzilində internet və bütün telefonlar kəsilib. Bu, planlaşdırılan müsahibədən 10 dəqiqə əvvəl baş verib.

"Mənim bütün gecə xarici aləmlə heç bir əlaqəm olmadı. Yalnız səhər tezdən (aprelin 14-də)  haradasa saat 10-da həm internet, həm də telefon əlaqəsi bərpa olunub", bu barədə Kərimli "Amerikanın Səsi"nə müsahibəsində bildirib.

"Hökumət rəqabətə hazır deyil. İctimai rəydə uduzduğunu bilir. Xalq çox narazıdır. Xalq müxalifəti eşitməkdə maraqlıdır.

Mən artıq 15 ildir ki, pasportsuzam, ölkəni tərk edə bilmirəm. Artıq 7 ildir ki, ofisimiz yoxdur. Rayonlarda tədbirlər, mitinqlər keçirmək imkanları da əlimizdən alınıb.

İndi, karantin dövründə ümumiyyətlə evdən kənara çıxmıram. İndi artıq telefon və internet üzərindən əlaqəmi də təhlükəli hesab edib, axşam onu da kəsdilər", deyə Kərimli bildirib.

"İlk növbədə Azərbaycan hakimiyyətinin özünü gözdən salır ki, heç cür siyasi rəqabətə hazır deyillər. İctimai rəy uğrunda mübarizəni uduzublar və ona görə də siyasi rəqiblərinə qarşı (hərçənd ki, onları düşmən hesab edir) qaydasız döyüş üsullarından istifadə edirlər", deyə Kərimli qeyd edib.

"15 ildir ki, mənə pasport verməyən, bütün müavinlərimi, müşavirlərimi, sürücümü, mühafizəçimi, köməkçimi, qaynımı, əmim oğlumu həbs eləmiş hakimiyyətdən internetdən azad istifadə etmək imkanımı təmin edəcəyini necə gözləyim? Hüquqşünas dostlarla məsləhətləşəcəyəm, Avropa İnsan Hüquqları Məhkəməsi perspektivi varsa Azərbaycan hökumətinin daha bir rüsvayçı hərəkətini ifşa etmək məqsədi ilə şikayət verəcəyəm", deyə o bildirib.

Kərimlinin sözlərinə görə, dövlət başçısı İlham Əliyevin Novruz bayramı ilə əlaqədar xalqa müraciətində "beşinci kolonun" təcrid edilməsi zərurətindən bəhs etməsi repressiyaların siqnalı idi. Koronavirusa qarşı mübarizə bəhanəsi altında hakimiyyət müxalifəti zəiflətmək, onu təcrid etmək qərarına gəlib.

Ölkədə çox böyük narazılıq toplanıb, hakimiyyət isə o qədər səriştəsizdir ki, bu siyasət davam etdiriləcəyi təqdirdə hansısa liderin olub-olmamasından asılı olmayaraq, Azərbaycan xalqı bu siyasətə etiraz etməyin yolunu tapar. Bu siyasət Azərbaycanı sosial partayışa doğru aparır, Kərimli belə hesab edir. -03B06-