İsa Qəmbər: “Növbədənkənar parlament seçkilərinin səbəbi hakimiyyətdaxili problemlərdir”

Bakı /04.12.19/Turan: Parlamentin buraxılması və növbədənkənar parlament seçkilərinin keçirilməsi barədə qərar  hakimiyyətdaxili problemlər ilə bağlıdır. Bunu Müsavat Partyasının keçmiş sədri, hazırda  Milli Strateji Düşüncə Mərkəzinin rəhbəri İsa Qəmbər bildirib.

“Hakimiyyət böhran içindədir. Uzunmüddətli bir böhrandır. Son illər vəziyyət iqtisadi cəhətdən xeyli ağırlaşıb. İndi də hakimiyyətdaxili problemlər öz təsirini göstərir. Parlamentin buraxılması məhz bununla bağlıdır”, - İ.Qəmbər “Amerikanın səsi” radiosunun Azərbaycan xidmətinə müsahibəsində deyib.  

İndi ailədaxili hakimiyyət dəyişikliyinə daha çox yararlı bir parlament formalaşdırmaq istəyirlər. 

İ.Qəmbərin fikrincə, hakimiyyət demokratik seçkilərə getməyəcək, çünki bilir ki, xalq onları dəstəkləməyəcək.

Yaranmış vəziyyətdə müxalifət partiyalarının taktikasına gəlincə, İ.Qəmbər hesab edir ki, onlar birgə hərəkət etməlidirlər, ya seçkilərə birgə getməlidirlər, ya da birgə boykot etməlidirlər.  Amma bu, mümkün olmasa, seçkidə iştirak edənlərlə seçkini boykot edənlər bir-birilərinə qarşı mübarizə aparmamalıdır.

“Müsavat Partiyası bu həftənin sonu seçkilərdə iştirak məsələsinə münasibəti müəyyənləşdiriləcək”, - İ.Qəmbər qeyd edib.16D-