Raketlər rus bazasından atılmış olsa, bu, müharibə aktı olardı – Pol Qobl

Bakı/02.04.21/Turan: Son günlər Şuşaya “İsgəndər” raketləri ilə zərbələrin erməni hərbiçiləri tərəfindən deyil, rus hərbiçiləri tərəfindən endirildiyi barədə iddialar getdikcə daha aydın şəkil alır. Moskva bu təxminlərə dəqiq cavab vermir, Bakı isə hələlik açıq demarşlar etmir.

Turan agentliyi bu vəziyyətin mümkün nəticələrini şərh etmək xahişi ilə məşhur Amerikalı politoloq Pol Qobla müraciət edib.

Bəzi təxminlərə görə, Şuşa şəhərində aşkar edilmiş raket qalıqları Rusiyanın Ermənistana verdiyi  raketlər deyil. Bu raketlərin Gümrüdəki Rusiya hərbi bazasında olan daha güclü raketlərdir.  Şuşaya atılan hansı raketlər olduğunu müəyyən etmək mümkündür?

Bu suala cavabda Qobl deyib: “Bu, texniki məsələdir, raketlərin qalan hissələrinin onları eyniləşdirmək üçün kifayət edib-etməməsindən asılıdır. Bu, həmçinin həmin raketlərin bir neçə əldən keçib-keçməməsindən asılıdır, ki, bu da  kimlərinsə  “məsuliyyətli olsalar belə”, bunu  “inandırıcı şəkildə inkar” etməsinə imkan verir”.

Raketlərin ruslar tərəfindən atıldığı təsdiq edilərsə, bu, regiondakı vəziyyətə necə təsir edə bilər və Rusiya qərəzsiz vasitəçi imicini qoruyub saxlaya bilər?   Bu suala cavabda Qolb deyib:

“Moskva Ermənistandakı bazasından bu raketləri Azərbaycana atmağı əmr etsəydi, bu, müharibə aktı olardı. Bu halda Bakı necə reaksiya verəcəyinə qərar verməlidir.

Bu, şübhəsiz ki, Moskva və Bakı arasındakı münasibətləri pozardı, Azərbaycanın Rusiyanın niyyətlərinə daha çox şübhə ilə yanaşmasına, eləcə də Ermənistana qarşı əməliyyatlara daha çox hazır olmasına gətirib çıxarardı”.

ABŞ-ın yeni administrasiyasının Azərbaycan və Ermənistan arasında münaqişənin siyasi nizamlanması prosesində daha fəal olacağını ehtimal etmək olar?

Qobl bu suala birmənalı cavab verib: “ABŞ-ın Rusiyanın əməllərinə göz yummamaq, onun qarşısını almaq istədiyini nəzərə alsaq, şübhəsiz, Bayden administrasiyası Tramp administrasiyasında daha fəal olacaq. Eyni zamanda, pandemiya ABŞ-ı bir çox daxili problemlərlə üz-üzə qoyub və ən azından yaxın aylarda bu problemlər prioritet təşkil edəcək”. -16B-