“Dedim Allah kərimdir”

Seçki təbliğatı iqtidar partiyasının sentybarın 3-də Samsunda  keçirdiyi mitinqlə  başladı və AKP-nin təbliğat mexanizminin əsas `instrumentlərindən` biri məlum  oldu:cənab Erdoğanın kürəkəninin silah  şirkəti və  o şirkətin təşkil  etdiyi festivallar. Samsun mitinqi göstərdi ki, 20 illik iqtidar partyasının ər  vilayətdəki mitinqiylə eyni  gündə   dövlət başçısının kürəkəninin təşkil etdiyi  TEKNOFEST sərgisi  də açıla  bilər. Əslində dövlət başçısından əvvəl bunun işarəsini kürəkənin özü verərək “İqtidardan gedilməsi halında işlərinin qabağına əngəl çıxarıla biləcəyinə” eyham vurmuş ancaq müxalif blok  bu eyhamın hikmətini idrak edə bilməmişdi.

Dövlət başçısı Erdoğan kürəkəninin şirkətinin uğurlarını dar çərçivəyə həbs etmir,siyasi təbliğat təcrübəsindən istifadə edərək ustalıqla `Türkiyə silah sənayesində yerli və milli silah istehsalının nə qədər artdığını` göstərmək üçün digər faktlarla birlikdə `Bayraktar` markasının adını da ön plana çıxarır: ”TEKNOFEST-i görüb qürurlanmamaq mümkün deyil. İqtidara gələndə (silah sənayesindəki yerli istehsalın payı) 20% idi ancaq indi 80%-dir. Hardan haraya gəlmişik? Bu, bir yerdə durmakla, yatmaqla olmur, cənab Kamal, işləməklə olur. Ancaq sağ olsun, TEKNOFEST-ə ekskursiyaya gedib, orada onu gəzdiriblər.

İnşallah, ilham alıb ”Seçkinin vaxtından 1 ay əvvəl keçirilməsiylə bağlı (vaxtında keçirilməsi halında hörmətli Erdoğanın namizəd ola bilməmə durumu ortaya çıxa bilər) iqtidar blokunun parlamentə gətirəcəyi qanun layihəsinə müxalifətin dəstək verib-verməyəcəyini  gözləyən cənab Erdoğan hər iki  halda müxlif bloku ağır salvolara tutacaq. Erdoğanın xarici siyasətdə Rusiyanın Ukraynaya hücumundan sonra yaranmış regional vəziyyətdə özünün cəhdlərini ön plana çıxaracağını onun mitinq meydanlarında və TV ekranlarındakı sözlərini təhlil edərək müəyyənləşdirmək mümkündür: ”İki gün əvvəl haradaydım? Ukraynada. Bir həftə əvvəl? Soçidə. Nə üçün? Dünyada sülhü bərqərar etmək üçün. Biz bu yolda dünyanı sülhə qovuşdurmaq üçün varıq. Millətə verdiyimiz söz və götürdüyümüz öhdəlik-ölkəmizi 2053-cü il dünyabaxışı ilə qlobal idarəçilik və iqtisadi sistemin ən yüksək səviyyəsinə çıxarmaqdır”

Bu sözlər Türkiyənin 20 illik iqtidar partiyasının və onun liderinin hədəflərindəki ciddi dəyişikliklərə işarə edir. Çünki 2011-ci  ilin iyununda keçirilmiş seçkidən üçüncü  dəfə qalib çıxandan sonra cənab Erdoğan siyasi fəaliyyətinin əsas hədəfi kimi  2023-cü ili müəyyənləşdirmişdi  və tərəfdarların öz dəstəyini geri çəkməməsi halında “Cümhuriyyətin 100-cü ilində daşı gədiyinə qoyacaqlarını” tez-tez təkrarlayırdı.İndi isə bu hədəfin 30 il irəliyə aparıldığını görürük (iqtidar blokunun ən kiçikdən əvvəlki üzvü MHP-nin lideri Devlet Bahçeli əvvəldən 2071-ci ili hədəf göstərib).

Yer kürəsindəki durumun az qala hər gün dəyişdiyi bir vaxtda 2053-cü ilin hədəfini bir tərəfə qoyub daha realist olsaq, görəcəyik ki, Suriya  ərazisində yeni bir hərbi əməliyyat keçirmək üçün Türkiyə nə Rusiyaya S-400 raketlərini deaktiv etdirə bilir  nə də bu ölkənin şimal-şərqində kanton yaratmış kürd terror  qruplarına verdiyi dəstəkdən vaz keçməsi üçün 70 illik  müttəfiqi ABŞ-ı buna  məcbur edə bilir.

Egey adaları ətrafında Yunanıstanla, demək  olar ki, hər gün yaşanan problemlərin  aradan qaldırılması bir tərəfə, ABŞ-ın və NATO-nun xəbərdarlıq belə etmədiyi Afina öz bildiyini oxumağa davam edir. Dövlət başçısı bu və buna bənzər durumları “Milli silah sənayesini inkişaf etdirilməsini silah tacirlərinin narahatlığına” bağlayır. Onun bu təsbitində həqiqət payı vardır ancaq bu və bunun kimi təsbitlər reallığı dəyişdirmədiyi kimi, seçki meydanlarında 20 illik iqtidar partiyasının imdadına nə dərəcədə yetişəcəyi də məchuldur. Ona görə Türkiyə siyasətinin və dövlət idarəçiliyinin ən təcrübəli şəxsiyyəti Recep Tayyip Erdoğan ehtiyatı əsla əldən verməyərək öz `qızıl ehtiyatı`ndan bu seçki təbliğatında qeyri-məhdud şəkildə istifadə edir: içki festivalları, açıq-saçıq geyinən qadın müğənnilərin konsertləri güzəştsiz şəkildə ləğv edilərək radikal dini söyləmlərin dili daha da sivriləşdirilir.

Türkiyə Cümhuriyəti tarixinin ən ağırinflyasiyası və devalvasiyasının yaşandığı və çarə tapmaq üçün pulun tapılmadığı bu atmosferdə imdada bundan başqa nə yetişə bilər ki?

Şəxsi mövqeyimi bir daha təkrarlamaq üçün oxuculardan icazə istəyirəm:Türkiyə siyasətinin və dövlət idarəçiliyinin ən tərcübəli şəxsiyyətinin ən gec 9  ay sonra keçiriləcək seçkidən də qalib çıxacağına inanıram.

Yazının başlığı marağınıza səbəb oldusa, Seyid Əzim Şirvaninin bir qəzəlinin rədifidir...