14-15 iyul mitinqindən sonra həbs olunmuş bir qrup şəxs azadlığa buraxılıb

Bakı/16.11.20/ Turan: Noyabrın 16-da  Səbayel Rayon Məhkəməsi iyulun 14-dən 15-nə keçən gecə Bakıda mitinq zamanı iğtişaşların təşkili ittihamı ilə həbs olunmuş 21 nəfərin barəsində həbs qətimkan tədbirini dəyişib.  Onlar ev dustaqlığına buraxılıb.

Ev dustaqlığına buraxılanlar arasında 12 nəfər AXCP fəalı, o cümlədən bu partiyanın Rəyasət Heyətinin üzvləri Fuad Qəhrəmanlı, Məmməd İbrahim, Asif Yusifli də var.

Prokurorluq onların ev dustaqlıgına buraxılması üçün məhkəməyə vəsatət verib.

Məhkəmədə bu iş üzrə dövlət ittihamını müdafiə edən prokurorlar vəsatəti təqsirləndirilən şəxslərdən bir çoxunun himayəsində azyaşlı uşaqlarının olması, onların az agır cinayətdə ittiham edilməsi, daimi yaşayış yerlərinin olması və s. ilə əsaslandırıb.

Məhkəmə prosesi online formatda keçirilib. Təqsirləndirilən şəxslər də online formatda məhkəmədə iştirak ediblər.

Bu cinayət isi üzrə təqsirləndirilən şəxslərin sayı 37 nəfərdir, onlardan 36-nın barəsində həbs-qətimkan tədbiri seçilmişdi. Həbsdə olanlardan 15-i AXCP üzvləridir.

Prokurorluq ümumilikdə 21 nəfərin ev dustasqlıgına buraxılmasını məqsədəuygun sayıb. “Müsəlman Birliyi” Hərəkatının iki üzvü – Kamil Mahmudov və Tural Vəliyev də həbsdən buraxılanlar arasındadır.

Hazırda bu cinayət isi üzrə 15 nəfər həbsdə qalıb ki, onların sırasında AXCP fəalları Ramid Nagıyev, Gündüz Mirzəyev və Elnur Cabbarov, Naxçıvan MR daxili işlər naziri olmuş Siyavuş Mustafayev də var.

Təqsirləndirilən şəxslərdən yalnız biri – AXCP üzvü Elvin Məmmədovunn barəsində istintaq dövründə başqa yerə getməməyə dair iltizam qətimkan tədbiri seçilib.

İyulun 14-də Bakıda minlərlə vətəndaşın Ermənistan-Azərbaycan sərhəddində gedən döyüşlərə dəstək məqsədilə keçirdiyi yürüş-mitinq iyulun 15-də səhərə yaxın polis tərəfindən dağıdılıb. Aksiyanın dağıdılması zamanı polis su şırnaqlarından, gözyaşardıcı qazdan və dəyənəklərdən istifadə edib.

Belə ki, gecə saatlarında bir qrup aksiya iştirakçısı parlamentin binasına daxil olub, polis avtomobili aşırılıb. Bu zaman polis aksiyaçıları parlamentin binasından çıxarıb və polislə qarşıdurma yaşanıb.

Yaranmış insidentlə bağlı cinayət işi qaldırlıb, çoxsaylı insan həbs edilib.

Rəsmi qurumlar həbs edilənlərin sayı barədə məlumat verməsə də hüquq müdafiəçiləri onların sayının yüzdən çox olduğunu güman edir.-03-