2023-cü ilin yanvar-may ayları ərzində Azərbaycanda narkotik vasitələrin qanunsuz dövriyyəsilə bağlı 5016 cinayət faktı aşkarlanıb

Bakı/17.06.23/Turan: Narkomanlığa və narkotik vasitələrin qanunsuz dövriyyəsinə qarşı mübarizə üzrə daimi fəaliyyət göstərən İşçi Qrupu 2023-cü ilin yanvar-may aylarının yekununa dair məlumat dərc edib.

Məlumata görə, bu ilin yanvar-may ayları ərzində hüquq-mühafizə orqanları tərəfindən narkomanlığa və narkotik vasitələrin qanunsuz dövriyyəsinə qarşı mübarizə sahəsində həyata keçirilmiş kompleks əməliyyat-axtarış tədbirləri nəticəsində 5016 cinayət faktı aşkarlanıb.

Onlardan 1707-si narkotik vasitələrin qanunsuz satışı, 3185-i narkotik vasitələrin qanunsuz əldə edilib saxlanılması, 96-sı qanunsuz olaraq narkotik xassəli bitkilərin kultivasiya edilməsi, 28-i isə bu kateqoriyadan olan digər cinayətlərlə bağlı olub.

Aşkarlanmış faktlar üzrə qanunsuz dövriyyədən ümumilikdə 3 ton 765 kq narkotik vasitə və psixotrop maddə çıxarılıb ki, bunun 1 ton 369 kq heroin, 1 ton 993 kq marixuana, 139 kq qr-nı tiryək, 44 kq  həşiş, 215 kq psixotrop maddələr, 2 kq 737 digər narkotik vasitələr təşkil edib.

Bəhs olunan dövr ərzində 27028 ədəd həb metadon, 4421 ədəd kapsul və 953 ədəd həb güclü təsir edən maddə qanunsuz dövriyyədən götürülüb.

Narkotik vasitələrin qanunusz dövriyyəsilə bağlı 3323 nəfər cinayət məsuliyyətinə cəlb edilib.

Cinayət məsuliyyətinə cəlb edilmiş şəxslərdən 43 nəfəri xarici ölkə vətəndaşıdır.

Narkotik vasitələrin və psixotrop maddələrin qaçaqmalçılıq yolu ilə Azərbaycana gətirilməsilə bağlı 116 fakt aşkar edilib, ümumi çəkisi 1 ton 700 kq və 27028 ədəd həb metadon narkotik vasitələr və 4421 ədəd kapsul, 953 ədəd həb güclü təsir edən maddə çıxarılıb.

Ümumilikdə, aşkar edilmiş cinayətlərin 100-ü qrup halında törədilib.

2023-cü ilin yanvar-may ayları ərzində qanunsuz dövriyyədən götürülmüş 3 ton 765 kq narkotik vasitələrin və psixotrop maddələrin ümumi dəyəri 157 milyon 555 min AZN kimi qiymətləndirilir. 0